Hato yn leh kumno u MDC ka Shella, la un bud ïa ka dienjat u hymmen ban rung BJP

Shillong, Nailur 23: Ka Khasi Hills Autonomous District Council (KHADC) hadien khyndai snem kala ioh biang ïa ki MDC kiba dei na ka Bharatiya Janata Party (BJP) hadien ka jingleit ban pynïasoh ki phra ngut ki MLA ka UDP sha ka BJP.
Napdeng kine ki phra ngut ki MLA kiba ïasoh sha ka BJP ha New Delhi mynta ka sngi Balang ki kynhtup ïa u Bah Pius Marwein u MLA ka Ranikor MLA ha kajuh ka por uba dei ruh MDC jong ka Langrin bad kumjuh ruh u Bah Synshar Kupar Roy Lyngdoh Thabah u MLA ka Sohiong uba dei u MDC ka Nongspung-Sohiong.
Lah ban kdew hangne ba hapoh KHADC dei ha u snem 2017 ba ka BJP ka ioh ban rung khlieh nyngkong eh, hadien ba u MDC ka Congress na Laitumkhrah-Malki u Bah Neil Antonio War u la pyniasoh sha ka BJP.
Da kane ka jingleit ïasoh BJP, ka jingdon MDC ka UDP ha ka Iingdorbar ba 29 ngut ka KHADC, kala hiar sha ka 3 ngut ba kynthup ïa u Nongialam ka Liang Pyrshah u Bah Titosstarwell Chyne (Sohra), Barikupar Synrem (Shella) bad Equator Nongrang (Mairang).
U dak jingkylli ba mih mynta ka long ba hato u MDC ka Shella un leh kumno, hato un bud ïa ka dienjat jong u MLA uba dei ruh u hymmen trai jong u Bah Barikupar kata u Bah Balajied Synrem uba dei u MLA ba la pyniasoh sha ka BJP.
Kumba long myntam hapoh Khasi Hills Autonomous District Council dei ka Voice of the People Party (VPP) kaba lam khmat ban ialam ïa ka Executive Committee.