Dei ba u ‘lehnoh’ ym dei ba u ‘lehpat’ sa kiew ka thaiñ Mawkynrew: Banteidor Lyngdoh

Shillong, Nohprah 21: U Bah Banteidor Lyngdoh, MLA ka Mawkynrew Constituency bad Myntri ha ka Sorkar Jylla u la ong ba ka jingkiew ka Constituency ha bun ki liang hi ka dei ba u lehnoh ym dei ba u lehpat.
Kane ka phang jingkren u Bah Banteidor ka la long ha ka jingïalang plie ïa ka ophis treikam ka All Primary School Teachers’ Association (APSTA) Mawkynrew Unit ha Lad Kharang myn ha ka 21 tarik u Nohprah, 2022.
Kaba la pynlong ïa u ban kren bad pyndonkam ïa katei ka kyntien ‘lehnoh’ ka dei hadien ba na ka liang jong u Babu FC Shullai, Secretary ka AMPSTA u la pynkynmaw ïa ki kam kiba mynshwa jong u Bah Banteidor ha ka por ba u dang dei u dkhot ka Hynñiewtrep National Liberation Council (HNLC), ka seng kieng atiar kaba la shah kheiñ beaiñ ha ka Sorkar.
U Bah Banteidor u la ïathuh ba mynshwa u shah kem bad shah set phatok ar snem ha Silchar bad u ong ba u la poi sha ka seng HNLC namar ka jingieid ia ka Jaidbynriew palat hynrei katei ka kam ka shah khein beaiñ ha ka Sorkar namar hap rah tiar ïaleh.
Da kaba ïathuh lyngkot ïa ka jingïaid lynti jong u, u la ong ba ka jingpoi sha ka HNLC ka dei namar ka jingshah khniot beiñ ki nongshong shnong. “Ynda la lait na phatok nga la pyrshang pat ban ïaid noh da kawei ka lynti bad poi ban bat kum u Chairman ka CPWD Association 20 snem lynter”, u la ong.
U la ong ba dei ha kata ka por u sa poi kylleng bad ïoh pat ban ïarap kylliang ïa ki briew lajong bad kumjuh da ka jingdon bynta ha ki synjuk ïalehkai phutbol ka nongbah Shillong bad ka Jylla.
Da kaba ong ba um don jingbabe ba u la don bad ka seng bad u sa long kumne ruh na ki jinghikai ha katei ka por, u la ong, “Por ba nga ïaid ban ïaleh ïa ka elekshon bun ki ong u lehnoh, ki tieng lut baroh hynrei ki nongshong shnong, ki longkmie longkpa bad ki kup shiliang ki sem shiliang ki kyrshan bad ïoh ka jingjop”.
U la ong ba haba u la poi pat ha ka bynta ban shakri ïa u paidbah hap ban trei watla ym lah ban leh lut nadong nadong.
Ha kane ka sngi, u Bah Banteidor u la aiti ruh ïa ka Work Order ba lai lak tyngka na ka SRWP Scheme kum jingïatreilang ban shna ïa kane ka ophis treikam.
U Babu FC Shullai, haba ai jingkren u la ong ba ïa u ba kren bieit dang don ka jingmab katba u ba kren kop ban thied ïa ka Bneng te ym don jingmab shuh.
Kane ka jingkren u Bah Shullai ka la long haba khyrwait bad kynthoh tyngeh halor ka jinghiar dor ka rukom long ki nongthaw-aiñ bad ka synshar khadar ha ka Jylla Meghalaya ha kane ka por ba mynta.
Ha shwa kine ki jingkren, ka Association ka la ïoh ban pynkup burom ïa ar ngut ki nonghikai kiba la shongthait noh na ka kam ba kynthup ïa u Babu L Syiemlieh bad i Kong M Songthiang.