Shillong, Nohprah 21 : U MLA ka Sohïong, Bah Samlin Malngiang ha ka sngi Ba-ar u la ong ba bun ki briew ki pihuiñ haba ki ïohi ba u sam ïa ki skim baroh da ka lynti kaba khuid bad ruh da ka lynti kaba shai.
Utei u MLA uban sa pynïasoh shen sha ka NPP ha ki khyndiat sngi ban wan u la pynpaw ïa kane haba kren sha ki lai hajar ngut ki paidbah kiba ïoh ïa ki skim bapher bapher na u kum u MLA.
“Katei ka jingtieng jong ki kadei beit tang kawei ka daw kata namar ba ki tieng lypa ïoh nga jop biang ha kane ka elekshon ban wan,” u la ong ha katei ka jingïalang kaba long ha madan Umsaw.
U MLA u la ong ruh tang namar ka jingbishni ïa kane ka jingsam skhim la don ruh kiba leit pan da ka Right To Information (RTI) na ophis jong u BDO Sohïong Block haba ka skhim kam pat wan na ka ophis jong ka Deputy Commissioner, East Khasi Hills District.
Shuh shuh u MLA u la ïathuh ba naduh ba u la jop ïa ka elekshon ha u snem 2018 haduh ban da kut u snem 2023 u la ïoh ban sam skhim sha ki paidbah haduh 12.81 klur tyngka.
Na ka liang jong u, u kyntu ïa ki paidbah ba kim dei ban shah ïalam bakla namar un dang sam beit ïa ki skhim sha ki paidbah lada u dang jop biang ha u snem 2023.
Ha kajuh ka por u la kyntu ïa ki paidbah ban jied ïa u nongmihkhmat donkam ïa u briew uba lah ban shakri namar ha ki por mynshwa u ong ba ki paidbah kim ju tip hangno bad haei la sam ïa ka MLA skhim hynrei naduh ba u shimti kum u MLA u la sam ïa ka skhim haba shit ba shai.
Ha kane ka sngi la ïadonlang u MDC ka thaiñ bah Sherborlang Mawlong bad u BDO Sohïong C & RD Block ryngkat ki riew rangbah, ki longkmie bad ki samla.
