Shillong, Nohprah: Ka Seng Hynñiewtrep Youths’ Council (HYC) Mawlai Mawiong unit ha ka step jong ka 21 tarik Nohprah 2022 hapoh ka jingïalam u Samla Drallington Iawphniaw kum u General Secretary ka la hiar sha ki 6 tylli ki jaka saitjaiñ jong ka shnong Mawiong Umjapung bad Mawiong Rim, kita ki long ha Nengnong-B, Tariang -A , Tariang -B bad ha Mawiong Rim ban leit ai sngewbha Khristmas ïa ki longkmie kiba im jakpoh da kaba bylla saitjaiñ.
Ha kane ka step ka Mawiong unit ha ka jingsynrang lang u President ka HYC Mawlai circle Bah Donboklang Kharlyngdoh ka la ïoh ban sam da ki tapmoh khlieh bad ki blanket sha kumba 90 ngut ki longkmie.
Na ka liang u Bah Donboklang haba ai jingkren u la ïaroh ïa ka seng HYC Mawiong unit ba ka la shim ïa kane ka bynta ban wan hiar shaduh sha jaka saitjaiñ, kata ruh baroh 5 tylli ki wah ha kaba ula ong kham ñiar ban shem ba ki briew ne ki nongmihkhmat kin leit sha ki jaka saitjaiñ kumne ban leit ai jingïarap ne ki jingai sngewbha Khristmas.Ngi ngeit ba phin pdiang ïa kine ki jingai baroh da ka mynsiem kaba khuid bad kaba kmen wat lada ki long ki jingai kiba rit.
Nalor kata u la kyrkhu kyrdoh ruh ïa kine kine ki longkmie kiba im lyngba kane ka kam saitjaiñ nong ba kin nang ïoh ki met ba koit bakhiah bad ruh ba kin nang ïa roi parum pareh. Shuh shuh ula ong ruh ba to ai ba ma ngi iwei pa iwei ngin rakhe ïa kane ka Khristmas da ka lynti kaba u nongbuh nongthaw un sngewbha shikatdei ïa ngi ki khun bynriew.
Kumjuh u Bah Drallington ha ka jingkren u la ong ba shibynta ka jingrakhe ïa ka Khristmas, ka sngi wan longbriew u Jisu Khrist uba long u Nongpynim u jong ngi, ka HYC Mawlai Mawiong ka la jied ban wan jngoh kyrpang ïa phi, u la ong ba haba ngi ieit ïa ka Jaidbynriew, ngi dei ban ieit ïa ka ïing ka sem, ngi dei ban ieit ruh ïa ki para briew kum ma phi, dei lyngba kane ka jingieit , ngi ruh ngi sa jied ba hashwa ka Christmas ngin wan ban ai ka jingai sngewbha sha phi, hoid wat lada i long iba rit hynrei ngi kyrmen ba phin pdiang da ka mynsiem kaba khuid.Kane ka long katkum u kyrwoh lyngba u Bah D.Myrthong Vice President HYC Mawlai Mawiong unit.
