Pynrem jur ka EJNC bad HYC ïa ka sorkar MDA ha kaba ïadei bad ka kam tih dewïong hapoh ka jylla

Khliehriat, Nohprah 21: Ki ar tylli ki sengbhalang ba kynthup ka East Jaiñtia National Council bad ka Hynñiewtrep Youth Council East Jaiñtia Hills, ki la pynpaw ka jingsngew khia halor ka jingpyllait ïa ka SOP ha kaba ïadei bad ka Mining Policy kaba la pynbna da ka sorkar jylla bad da ka jingsngew khia kitei ki ar seng ki la pynpaw ruh ka jingbym hun ïa ka SOP kaba ïadei bad ka kam tih dewïong hapoh ka jylla.
La ong ruh ba ka liang ka Save Hynñiewtrep Mission kan pynlong ïa ka jingïaid paidbah (rally) ha ka 30 tarik mynta u bnai ka ban sdang naduh shnong dkhiah shaduh u mot sah nam u woh Kiang Nangbah uba don ha syndah ka office u Deputy commissioner ha Khliehriat kaba dei ruh ka sngi ïap u Kiang Nangbah.
Ha kaba ïadei bad ka kam tih dewïong, u president rangbah ka East Jaiñtia National Council, u bah Sambormi Lyngdoh u pynrem jur ïakane ka sorkar MDA ba la lamkhmat da ka party NPP, kaba la pynmih ïa ka hukum kaba ong ba lada uno yno uba kwah ban applai prospecting licence u dei ban don beit ka jaka kaba ym duna ïa ka 100 hectares, ïa kane ka jingbthah jong ka sorkar ka seng kam lah ban pdiang da lei lei ruh namar kane ka dei tang ka buit ki high level bad kane ka dei ruh ka buit ban ailad ne plie lad ruh ïa ki benami.
“Haka juh ka por ruh ka seng ka pynrem jur ïa ka jingkren u Conrad sangma ha Jowai, uba la ong ba ïa mynta ym pat la shim rai na ka bynta ki rit ki ria kiba kwah ban khaïi dewïong. Ka seng kala ioh ruh ban sam ïa ki kot lyngkdop sha ki paidbah halor ki kyndon jong ka mining policy (kaba ïadei bad ka kam tih dewïong)” ong u bah Sambormi.
U Bah Sambormi bad u la ïathuh ruh ba “Na ka liang ka Save Hynñiewtrep Mission ngi la dep phah ïa ka memorandum sha u myntri rangbah ka jylla, u Conrad Sangma bad la pynpaw ïa ka jingpyrshah ïa ki kyndon kiba don ha ka SOP na ka bynta ban ïoh ïa ka prospecting license na ka bynta ban tih ïa u dewïong, kaba nyngkong kaba ngi pyrshah ka dei ka ka 100 hecter, kane ka long kaei kaei kaba buh jingeh ïa ki paidbah khamtam ha ka thaiñ jong ngi bad kito kiba trei dewïong namar dang duna ki paidbah kiba don ïa ka jaka kaba da ki spah hecter, kaba ar pat ngi pyrshah ïa ki kyndon kiba la ong ba kino kino ki company ne kino kino kiba na bar kiba kwah ban aplai ïa ki prospecting licence kiba dei ki bar jylla ki lah ban ïa soi ïa ka jingmynjur na ka bynta ban ïoh ïa katei ka prospecting licence bad kane ka kyndon kan sa ktah ïa ki riti ki dustur jong ka ri bad ka jaitbynriew jong ngi namar haduh haduh mynta hi ngi ha Meghalaya ngi dang pyrshah bha ïa ka Benami Act te lada ngi peit ïa kane ka SOP ka paw shai ba kan don beit ka Benami ha ka kam khaïi dewïong”
U tei u nongïalam ka EJNC, u la kynthoh jur ruh ba kane ka SOP ka paw shai ruh ba ka sorkar ka la shna na ka bynta ban wanrah ïa ka Benami bad na ka bynta ki High Level.
U pynbna ruh ba ha shwa ban pynlong ïa ka jingialang ha ka 30 tarik mynta u bnai nohprah kan sa don shwa ka jingbuh syntiew ha u mot Kiang Nangbah kum ka dak ka jingkynmaw burom ïa u khla wait ka ri bad ha ka jingïalang yn ïakren halor ka phang kaba ïadei bad ka kam tih dewiong bad ki khyndai tylli ki mat jingdawa ba la dawa da ka Save Hynniewtrep Mission.