Haba 10 Akar ka jaka la don lypa ha ka ophis barim, balei pynkynriah sha Lum-umpih : JAC bad Seng Bhalang

Nongpoh, Nohprah 21: Ka Joint Action Committee Against Shifting of BDO Office Umsning ryngkat ki seng bhalang mynta ka sngi ki la dang pyrsawa jur ïa ka jingpyrshah kaba jur halor ka jingthmu ban pynkynriah noh ïa ka C&RD Block Office Umsning sha Lum-umpih bad na ka liang ka JAC ka la dang ioh bor ruh hadien ba la kyrshan lang da ki 3 tylli ki seng bhalang ba kynthup ïa ka HNYF, HITO bad ka CoRP na Ri Bhoi District.
Ka JAC against shifting of C&RD Block Office na Umsning sha Lum-umpih ka la pynpaw ruh ka jingpyrshah ka dei hadien ba la suit la shor mynta ka sngi ïa kane ka JAC ba la kyrshan da ki 30 tylli ki Dorbar shnong ba hap ha ka Umsning C&RD Block ha Ri Bhoi District. Ïa kane ka JAC la lamkhmat da u Bah R. Kharkrang kum u Chairman bad u Bah Dondor Marbaniang kum u Secretary.
Na ka liang ka JAC bad kitei ki 3 tylli ki seng bhalang halor ka jingpyrshah ban pynkynriah ïa kane ka ophis C&RD Block na Lumnongrim Dewlieh sha Lumumpih, ki la leit ban aiti ruh da ka dorkhas sha ka ophis u BDO ban dawa ba dei ba sangeh mardor halor kane ka jingthmu ban pynkynriah ïa katei ka ophis u BDO sha Lum-umpih. Shuh shuh ki la rai ruh ban leit ai da ka shithi ujor sha ka myntri ba dei peit ïa ka tnad C&RD Block, Chief Secretary bad ruh sha u MLA ka Umsning Constituency.
Haba kren sha ki lad pathai khubor, ki nongïalam ka JAC bad ruh ki Seng Bhalang ki la pynpaw ba ki da pyrshah jur ïa kane ka jingthmu ban pynkynriah sha kawei ka jaka ïa katei ka ophis u BDO Umsning bad ki la kynnoh ruh ba u BDO ka Umsning, u la leh leh sop sop ïa kane ka jingthmu pynkynriah jaka ïa katei ka ophis treikam bad kynnoh ruh ba don ei ei sha lyndet halor kane ka jingthmu pynkynriah ïa katei ka ophis treikam u BDO.
Ki la ong bad buh ruh ka jingkylli ba u BDO u la ai daw ba katei ka jaka ka la khapngiah bad dei ban pynkynriah noh ïa katei ka ophis treikam bad kane kam lah ban long kumno kata ka jaka kaba don ha Lumumpih ka don tang 2 akar ka jingheh bad kane kaba la don lypa pat ka don haduh 10 akar bad kane ka paw shai ba lada pynkynriah ïa kane ka ophis treikam ka dei kaba don ei ei sha lyndet.
Namarkata, ki la ong ruh ba ki la dawa mardor na ka sorkar ruh ba kam dei ban pynkynriah ïa katei ka ophis treikam bad dei ban pynheh ne pynbha ha katei ka jaka ba la don lypa kaba la don haduh 10 akar ka jingheh ka jaka bad ha kajuh ka por ruh ki la dawa ba dei ban pynkynriah kam noh ïa une u BDO uba don mynta, namar kine ki kam ba thmu ban pynkynriah ïa katei ka ophis la kynnoh ba dei tang ka jingleh sop sop suda, bynrap ki nongïalam ka JAC bad Sengbhalang.