Nongpoh, Naiwieng 17: Da ka jingthmu ban pynshlur ïa ki samla pule ban don bynta ha ki kam synshar paidbah bad ban kyntiew ïa ka sap kren paidbah, ka Mahatma Gandhi University (MGU), Meghalaya, ha ka jingïatreilang bad ka MY Bharat, Ri-Bhoi District, haka 16 tarik Naiwieng, ka la pynlong ïa ka District Level Youth Parliament ha phyllaw jong ka skulbah MGU, Ri-Bhoi.
Ïa kane ka lympung la pynlong halor ka phang “Nasha Mukt Yuva for Viksit Bharat”, ha kaba ki samla pule na ki shlem pule bapher bapher hapoh Ri-Bhoi District ki la wan ban shim bynta bad pynpaw ïa la ki jong ki jingsngew bad ki jingmut halor ka jingdonkam ban tei ïa ka imlang sahlang kaba lait na u drok bad ki jingdih pynbuaid.
Ha kane ka sngi, u Bah Sosthenes Sohtun, Myntri ka sorkar jylla bad MLA/MDC ka Jirang, u la wan ban sakhi kum u songsan, katba u Bah F. Rumnong, State NSS Officer, Meghalaya, u la long kum u symbud kongsan. La donlang ruh u Bah Michael Thangminlien Mate, Deputy Director, MY Bharat, Ri-Bhoi, bad u Prof. (Dr.) Sagar O. Manjare, Vice-Chancellor jong ka MGU, ryngkat kiwei kiwei.
Ka thong jong kane ka Youth Parliament ka long ban ai lad ïa ki samla ban pynpaw ïa la ki jingmut lyngba ka rynsan ïakren paidbah, ban pynsngewthuh ïa ki shaphang ka riti synshar ka ri bad ban pynkhreh ïa ki kum ki nongïalam jong ka lawei kiba don ïa ka jingsngewkitkhlieh ïa ka imlang sahlang bad ka ri.
Ha kaba ïadei bad ka jingïakop, u Samla Wanmi Russel Makdoh u la jop ïa ka kyrdan ba nyngkong, bud sa u Samla Kyrmenskhem ha ka kyrdan ba ar, katba u Gaurav Kumar Baruah u la ïoh ïa ka kyrdan ba lai.
Kine lai ngut ki nongjop kin sa mihkhmat ïa ka Ri-Bhoi District sha ka State-Level Youth Parliament kaban long ha nongbah Shillong.