Nongpoh, Naiwieng 17: Ki nongïalam jong ka FKJGP Baridua Circle, hapoh ka jingïalam u President, u Samla Denis Nongrum, ryngkat u General Secretary, u Samla Allan D. Sohpdang, mynta ka sngi ki la leit ban ïakynduh ïa u SDO jong ka tnat PWD, Nongpoh, ban pynsngew ïa ki jingeh kiba mad da ki paidbah bad khamtam eh ki khynnah skul namar ka jingbym biang jong ki surok ha ki thaiñ Baridua bad Killing.
Ha kane ka jingïakynduh, ki nongïalam ka seng ki la aiti ruh ïa ka dorkhas sha utei u ophisar, da kaba kyntu ïa ka tnat PWD ban shimkhia bad pynsted ïa ka jingmaramot ïa kitei ki surok khnang ban pynsuk ïa ka leit ka wan jong ki paidbah.
Haba kren sha ki lad pathai khubor hadien ka jingïakynduh, ki nongïalam ka FKJGP ki la ïathuh ba na ka liang jong u ophisar PWD, u la pyntip ba ka tnat ka dang pyrshang ban wad ki lad ki lynti ban pynbha ïa ki surok ha Baridua bad Killing.
Nalor kata, ka seng ka la pynsngew ruh ïa ka jingdonkam ban shna ïa ki nala pynïaid um kiba biang harud jong ki surok, namar ha ka por slap, ka um ka ju tuid napdeng surok, kaba nang pynsniew shuh shuh ïa ka jinglong jingman jong ki surok.
Namarkata, ka FKJGP Baridua Circle ka kyntu jur ïa ka tnat PWD bad ka sorkar jylla ba kin shimkhia ban pynbha noh ïa kitei ki surok, khnang ban pynsuk bad ban pynthikna ba ka leit ka wan jong ki paidbah kan long kaba shngaiñ, khamtam ïa ki khynnah skul bad ki samla pule kiba pyndonkam man ka sngi ïa kitei ki surok.