Dawa ki nongrep ka West Khasi Hills ïa ka Sorkar ban pynbun ki lad jingiarap

0

Nongstoiñ, Ïaïong 10: Ki nongrep bad nongri jingri bapher bapher jong ka West Khasi Hills, ki kyntu ïa ka sorkar Jylla ba kan phai khmat lem na ka bynta ki nongrep, namar kumba long haduh mynta hi ki lad jingïarap jong ka sorkar na ka bynta jong ki, kim pat biang satia bad khambun na ki nongrep ki dang kyrshan borbah dalade ïalade ban pynim bad pynbha ïa ka rep ka riang.
Ha West Khasi Hills kham bun ki dang im ha ka rep ka riang, ka bylla sngi bad tang katto katne kiba trei ïa ki kam khaïi pateng bad kiwei kiwei. Hynrei ha kine ki sngi, ki hajar ngut ki samla kiba la biang ka kyrdan pule ki long kiba khlem kam khlem jam. Kumta bun ki hap ban phai khmat sha ka rep lyngkha bad ka kam ri jingri.
Bun na ki nongrep na kane ka District, ki la ong ruh ba ha kine ki sngi ka rukom rep ka dang long beit da ka bor met, namar ka jingbym nang jong ka sorkar ban thaw ïa ki polisi na ka bynta ka rep ka riang. Bun ki la pynpaw ïa ka jingsngewdiaw mynsiem ïa ka jingbym kheiñ snep jong ka sorkar, ha kaba ïadei bad ka rep ka riang, kaba long ruh tang ma ka, ka lad kamai kajih bad pynim ïa ki nongshong shnong ka Jylla.
Katto katne ngut ki nongrep kiba dei na ka thaiñ Nongstoiñ, Markasa, Marngor, Mawliehbah, Rambrai bad na ki thaiñ Riangdo, ki la ong ba katba nang mih ki snem, ka rep ka riang kam ïadei shuh bad ki snem ba mynshuwa. Ka jingbun briew ka la nang kiew, ka jinglong ka mariang ka la kylla, ki aïom kim ïadei shuh bad katei ka jinglong ka la ktah haduh katta katta ïa ka rep ka riang jong ki.
U Bah Dlingshon Marweiñ na ki thaiñ Markasa, kumjuh ruh u bah J.R.Ïawphniaw na ki thaiñ Marngor, ki la pynpaw kajuh ka sur ba ka jingphai khmat jong ka sorkar tang sha ki nongtrei ophis da kaba pynkiew tulop ïa ki man ka por, ka pyni shai kdar ba ka don ka jingñiew shilliang khmat ïa ki paidbah nongrep.
Ki la ong ba lada ka sorkar ka don ïa ki polisi na ka bynta ban pynkiew tulop ïa ki nongtrei ophis kum ka 4th bad 6th pay Commission, balei pat kam lah ban shna polisi na ka bynta ki nongrep lyngba ka Agriculture Department.
Ki la ong ruh ba ki nongtrei ophis ki dei ki briew ki bym ju mad jingeh satia naduh ba ki sdang ban ïoh kam, namar ki la lait na u slap, ka lyer, ka jingshit ka sngi bad kiwei kiwei ki jingeh. Namar ki mih na ïing sha ophis na ophis sha ïing bad baroh shi sngi ki shong beit ha ka shuki. Ka por trei jong ki ruh tang hynñiew kynta, ka tulop pat tang u Chowkidar kan ym duna ïa ka ar phew san hajar shi bnai.
Ki la ong ruh ba ki hajar ngut ki nongrep, ki la pyrshang ban wad ïa ki lad jingïarap na baroh ki liang hynrei kim shym ïoh satia. Baroh shikatta tang kawei ka lad jingïarap kaba ki shem bad kata ka dei lyngba ka shim ram na ki Bank. Hynrei katei ka jingïarap ka long da ka ram ym da ka Subsidy bad haba la pyrshang ban pynheh bad pynbha ha ka rep ka riang, la shah pynjulor noh ha ka mariang bad ki mar rep baroh ki la shu sep ei.
Ki la pynpaw ruh ba kaba kham sngewsih ka long ba watla ïa ki jingthung jingtep la pynjulor da ka mariang haduh ba ym lah shuh ban pynmih pisa, ka Bank pat kam ju pyrkhat satia. Hynrei ka dawa beit ba ki dei ban wan siew ïa ka pisa ba ki la shim. Lada ym lah ban siew ha ka por ba biang yn pynshitom katkum ka aiñ.
Kitei ki rangbah ki la ong ba lada ka sorkar ka don ïa ka polisi pynkiew tulop, hynrei kam don pat ïa ka polisi ban kyntiew ïa ki nongrep, ka la dei ban thaw noh da ka polisi ban map ei noh ïa ka ram jong kito ki nongrep kiba ki jingthung jingtep jong ki, ki la shah pynjulor ha ka mariang.
Ka sorkar ka la dei ban leh ei ei na ka bynta ka jingmyntoi jong ki paid nongrep, namar haduh mynta palat arspah tam ki paidbah nongrep ki dang sah ram ha ki Bank. Ka sorkar ka la dei ban phai khmat lem sha kitei ki nongrep kiba shah ram, khnang ba ki nongrep kin kham sting ka jingmut jingpyrkhat jong ki.
Ha ki Jylla ri thor bun bah ki dkhar ki shim noh ïa ka jingim tang na ka jingshah ram na ka daw ka jingshah pynjulor ha ka mariang. Kumta, la donkam ba ka sorkar kan pyrkhat sani bha bad lada ka lah ban pynkhlaiñ ïa ka mang tyngka na ka bynta ki nongrep, kane kan ïarap ba kin lah ban thung ban tep ar sien lai sien ha ka shi snem.

Leave A Reply

Your email address will not be published.