Nongstoiñ, Ïaïong 10: Ka Seng WKSU ka dawa bad pynpaw ïa ka jingkyrshan ba pura halor ka jingdawa ba kongsan jong ki paidbah ka Malangkona ban don noh la ka jong ka ktem pulit ba pura ha katei ka thaiñ khappud bad ka Assam.
“Ka sorkar jylla hapoh ka jingkhmih da ka tnad pohïing ba ka dei ban shim ba kane ka jingtyrwa na ki paidbah jong katei ka thaiñ ka long kaba donkam haduh katta katta”, ong ka kyrwoh khubor ba la pyllait da ki nongïalam ka seng.
“Ka Seng ka pynpaw ba katei ka thaiñ khappud bad ka Assam, ka dei ka thaiñ ba shah pyndik man ka por, lada dei ha kino kino ki kam ki jam jong ki paidbah nongshong shnong jong katei ka thaiñ. Ym tang katta la shah pyndik wat ïa ki kam jong ka sorkar Meghalaya ha ki jingpyntrei ïa kino kino ki kam pynroi kum ki surok, ki lynti syngkieng, ka bording bad kiwei kiwei da ki pulit jong ka sorkar Assam, kumba la jia ha ki snem kiba la dep”.
“Kumta ka long kaba donkam ïa ka sorkar jylla ban phai khmat noh mynta sha ki jingeh ki paidbah ka thaiñ khampud ha ka liang ka shong suk shong shngaiñ, ka rep ka riang ka khaïi ka pateng bad kiwei kiwei ki jingdonkam jong ki paidbah katei ka thaiñ ba dang sahdien ha ki ba bun ki liang”.
“Ka seng ka kyntu ïa ki bor District bad ki tnad bapher ban shimkhia ïa kine ki jingdonkam jong ki paidbah, kiba la pynsngew lyngba ki lad pathai khubor. Ki bor District kin shimkhia ïa ki jingdawa ba shong nia jong ki paidbah ki thaiñ khappud, da kaba kin pynlong ka jingleit jurip khah khah lane leit ïakynduh ïa ki nongshong shnong jong katei ka thaiñ, khnang ban tip kiei ki jingeh kiba ki paidbah ha katei ka thaiñ ki ïakynduh”.
“Ka seng ka kyntu kyrpang ïa u Superintendent of Police Nongstoiñ, ba un buddien kham sted ïa kaei ba ki paidbah ka thaiñ Malangkona bad ki shnong ba don ha ki khappud bapher bapher kiba hap ha ka Mawshynrut Civil Sub-division ki ïakynduh jingeh”.
“Kan long kaba sngewtynnad lada un shimkhia da kaba un pynsngew kham jam lyngba ki jingtyrwa jong u hakhmat ka sorkar lyngba ka tnad jong ka kam pohïing, ba ka Shnong Malangkona ka la donkam shisha ban shna bad don noh la ka jong ka ktem pulit kaba khlaiñ lane wat ban tei ïa ka Police Station kaba pura, khnang ba ki paidbah ba shong ha katei ka khappud bad ka Assam kin ïoh ka jingshong suk shong saiñ”, ong ka kyrwoh na u Samla D.Sun President WKSU seng kmie.
