Lada phi kwah ban shakri Blei laitluid jied ïa ka Congress ong u Bah Pala ha Nongstoiñ

0

Nongstoiñ, Naiwieng 18: U MP barim ka Jylla u ba long ruh mynta u kyrtong MP na ka seng Congress u Bah Vincent H.Pala, u la ong ba lada ki paidbah kim sngewthuh kumno ban jied ïa u nongmihkhmat sha ïingdorbar thawaiñ jong ka Parliament, ka jingma kaba khraw khamtam eh ïa ki Khristan ka ap namar ka sorkar ha Delhi ba la ïalam da ka BJP, ka mut ban iuhroit ïa ka hok ki rit paidbah khamtam ki Khristan kiba don kylleng ka ri India.
Ïa kane u la pynpaw ha ka sngi balang ha ka jingïalang paidbah ban ïalap elekshon ha sor Nongstoiñ, kaba long kum shibynta ban pynkhreh na ka bynta ka MP bye election ka ban sa long shen ha kine ki bnai ki ban wan.
Haba kren hakhmat ki paidbah ha ka jingïalang kaba la pynlong ha rynsan kaba don ha Market Complex New Nongstoiñ, u Bah Pala u la ong ruh, “Kiba bun ki nongïalap kiba wan na kylleng ki ri ka pyrthei ban ïalap, hynrei bun ki shah pynphai ha Airport lyngba ka aiñ Anti Conversion. Ha kane ka aiñ lada lap ba pynïathoh lane pynkylla niam khlem ïoh jingbit, yn shah set shiphew snem bad hap siew shiphew lak. Lada pynbaptis ïano ïano bad uno uno ba kylla niam yn pynshitom shiphew snem ryngkat ka kuna kaba shiphew lak”.
Ka don ruh sa kawei ka clause kaba dei ka Force conversion lane ka jingpynkylla niam jubor, ha kaba lada don ba ujor halor ka kam pynïathoh lane pynkylla niam kin shah kem. Kumba long mynta ha West Bengal, da ki phew tylli ki skul bad ki ïingmane ki shah pynjot shah pynpra lyngba kane ka aiñ kaba la tip kum ka anti conversion. Ha ka jylla lehse ngi lah ban ong mynta ba kane ka lah ban treikam tang ha kiwei ki jylla ym ha Meghalaya, kata kam lah ban long namar ngi ruh hangne ngi hap ban pyndonkam ïa kane ka aiñ”.
“Ki la don kiba la pynpaw ba ka NPP kaba ïatreilang bad ka BJP, ka pyrshah ïa kane hynrei kam long kumta namar ha ka por jong ka CAA ruh nyngkong u Conrad Sangma u pyrshah, hynrei ha ka por ba pass ïa kane ka bill ki ïakyrshan lang. Ka jingpyrshah kaba shabar kam don jingmut hynrei kaba ngi vote ha parliament kata ka long kaba donkam”.
“Kawei pat ka bill kaba ka sorkar BJP ka peit mynta bad ka pynkhreh ka dei ka Uniform Civil Code. Kumba long haduh mynta ki la don haduh saw tylli ki jylla kiba lah pass ïa kane ka bill. Kane ka bill ka ktah ha ka shongkha shongman, ha ka hiar pateng bad ha ka jingdon jingem jong ngi kum ki riew lum kiba rit paid. Ha kane ka bill lada dei u Hindu, Muslim, Khristan lane kiwei kiwei ruh ngi hap ban long kajuh”.
“Uno uno u briew lane kano kano ka briew kim lah ban don ar ngut ki lok, ha kaba na ka liang jong ngi ki Khristan ngim don jingeh. Hynrei, kaba ktah ïa ngi ka dei ka jinghiar pateng namar ha ki Hindu ka jinghiar pateng ka long sha u khun nyngkong shynrang, katba ngi pat ka riti dustur ka hiar pateng ka long sha ki khun khatduh kynthei. Kumta kan wanrah ka jingklumar kaba jur bad shibun kiei kiei kiba wanrah ki jingeh”.
Shuh shuh u la ong ruh, “Ngi dei ban sngewthuh haba kyrshan ïa ki party, namar ka shi vote ha ka NPP lane BJP ki dei ki juh hi khlem ïapher. Namarkata nga nud ban ong ba dei tang ka Congress kaba lah ban ïada ïa ki rit paid na kine kiei kiei ki jingeh ki ban sa wan tyllep ïa ka jaidbynriew jong ngi”.
Ha kane ka sngi nalor u Bah Vincent H.Pala la synran da u bah Erick Kharsyntiew President ka District Congress Committee West Khasi Hills, bah JTS Thongni MDC barim ka Rambrai Jyrngam Bah Phailostar Thongni bad kiwei kiwei.

Leave A Reply

Your email address will not be published.