Tlot ka jingshakri ka Civil Hospital bad MCH Nongstoiñ ba duna Doktor bad nurse
Nongstoiñ, Naiwieng 18: Hadien ba la ïoh pdiang shibun ki jingujor ha kaba ïa dei bad ka jingtlot jong ka Civil Hospital bad MCH, ki dkhot nongïalam ka KSU Nongstoiñ Circle ha ka sngi balang jong ka taiew, ki la leit ban ïakynduh bad ai jingthoh hakhmat u Medical Superitendent jong ka Civil Hospital Nongstoiñ bad I Medical Superitendent jong ka Maternal and Child Health Hospital.
Ha ka jingïakynduh ba la lamkhmat da u President Samla Robertgill Khardewsaw ha ryngkat u General Secretary Samla Shemlang Kharbani, la ïoh ban ïakren bniah halor ki jingduna hapoh ka Civil Hospital Nongstoiñ bad ka Maternal and Child Health Hospital Nongstoiñ.
Ki daw ba kongsan jong ka jingtlot kine ki jaka ai sumar ka long namar ka jingduna jong ki Doctor bad ki staff nurse ha baroh ar tylli kitei ki jaka sumar. Kane ka long ka jingdkoh bad ka pynduhnong ïa ki paitbah kiba khmih lynti ïa ka jingsumar ba paka.
Kumjuh ruh na ka liang jong ka seng ka dawa na ka tnad ba dei peit ban pynbiang da Ambulance ba pura ha baroh ar tylli ki jaka sumar. Ka seng ka la ïoh ruh ban kren halor kiwei kiwei ki mat, kum ki dawai dashin bad ki rukom sumar na ka bynta ki paidbah, ha kaba na ka liang ki bor ba dei peit ha ka liang ka koit ka khiah, ki la pynpaw ban shimkhia.