Shillong, Naiwieng 03: Ka Umpling Sports Club ha ka sngi Palei ka la plie pyrda ïa ka jingrakhe ïa ka Jubili Ksiar ka jingïaid lynti jong ka klob da kaba pynlong ïa ki prokram ba harukom.
Ïa kane ka jingrakhe la wan ban plie pyrda da u Chief Executive Member ka KHADC Bah Pynïaid Sing Syiem ha ka jingïalang kaba la pynlong ha Iing Dorbar jong ka Umpling ryngkat ka jingdonlang ki nongïalam Shnong kynthup u Rangbah Shnong, Bah SF Pyngrope, ki Seng Longkmie bad khamtam eh ki nongïalam jong ka klob.
Haba kren kum u Kongsan ha kane ka sngi, u Bah Pynïaid u la pynpaw ka jingkmen ban ïoh ban ïadon bynta lang bad ka klob ha ka jingplie pyrda ïa ka jingrakhe Jubili Ksiar kaban neh baroh shi snem kynthih. Ha kajuh ka por u ai ruh ka jingïaroh ïa ka jingnoh synniang jong ka klob ha kaban kyntiew ïa ki khun samla, ki khynnah bad ki heprit kumjuh na bynta ki nongshong shnong jong katei ka thaiñ.
“Kum ka klob, phi don ruh ka bynta kaba khraw bha na bynta ban tei ïa ka imlang sahlang khamtam ban pynlong ïa ki prokram ai jinghikai sha ki samla ha ki liang bapher bapher,” u la ong.
Ha kajuh ka por u la pyntip ruh ba na ka liang u Myntri Rangbah u la kular ban noh synniang 5lak tyngka na bynta kane ka jingrakhe jong ka Club.
Shwa kane la ïoh ruh ïa ka jingkren na u Rangbah Shnong kumjuh na u Assistant Secretary ka Umpling SC Bah Banbhalang Diengdoh bad kumjuh na u President ka Sports Club, Bah L Jyrwa nalor kiwei kiwei.
La pynphuh shuh shuh ia kane ka sngi da ki jingrwai bad ki jingïalehkai ba harukom kiba ki skul bapher bapher ki wan ban shim bynta.
Ha kane ka sngi na ka Liang ka Club ka la pynlong da ka Sales of Work ha kaba la wan ban ïashim bynta da ki bun tylli ki skul kiba don hapoh ka shnong Umpling.
