Sha ka sem Congress leit phai biang ki nongïalam ka NPP Nongpoh ryngkat ki nongbud

Nongpoh, Naiwieng 01: Lai ngut ki nongïalam ba hakhmat jong ka National People’s Party (NPP) Nongpoh Block ryngkat ki spah ngut ki nongkyrshan ha ka sngi Thohdien ki la leit ban pynïasoh noh ïalade sha ka Congress shuwa ka elekshon MDC ha ka jingïalang pdiang burom kaba la long ha Nongpoh.
Ki lai ngut ki nongïalam ba hakhmat jong ka NPP ki kynthup ïa u Bah Minsing Makri uba bat kum u Adviser ka NPP Nongpoh Block, u Bah Stoiñ R. Syngkli uba dei u Working President ka NPP Nongpoh Block bad u Bah Lawrence Nongrum uba dei u Secretary barim jong ka NPP Nongpoh Block bad ïa kine ki lai ngut la pdiang sngewbha sha ka party Congress da u President jong ka Ri-Bhoi District Congress Committee u Bah MG Kharshanlor.
Ha kane ka sngi la sakhi ruh da ka jingdon lang kiwei kiwei ki nongïalam kiba hakhmat jong ka Congress naduh ka kong President jong ka Meghalaya Pradesh Mahila Congress Committee ka Kong Joplin Scott Shylla, u Vice President jong ka RBDCC u Bah Rocky Marwein, u President jong ka NBCC u Bah S.W Mallai, u General Secretary jong ka NBCC Bah D Kharshandi bad kiwei kiwei.
Nalor ki lai ngut ki nongïalam kiba hakhmat jong ka NPP la pynïasoh da ki spah ngut ki nongkyrshan jong ka NPP na ki shnong bapher bapher jong ka thaiñ Nongpoh.
Ki nongïalam jong ka seng Congress ki la pynpaw ka jingkmen kaba khraw halor ka jingphai jong ki riew rangbah sha ba la ih bha ha ka saiñpyrthei sha ka seng Congress namarba ki sngewthuh shai ïa ka jingtreikam jong ka NPP ha ka jylla bad kane ka jingwan pynïasoh jong ki ka la nang pynïoh bor shuh shuh ïa ka Congress ban kan nang khie im shuwa ka elekshon MDC ban sei biang ïa ki nongïalam bad ki khraw pyrkhat.
Ki la pynpaw ruh ba kane ka jingwan pynïasoh jong ki lai ngut ki nongïalam bad ki nongkyrshan kiba la ïaw ka long ka jingkyrmen ïa ka seng Congress ha Nongpoh Constituency khamtam ban pynkhreh shaid shaid ïa ka elekshon MDC ban sa wan bad kum ka iing jong ka seng Congress kam don satia kano kano ka jingpynïapher ïa ki dkhot barim ne kiba dang rung thymmai hynrei ban don ka mynsiem jong ka jingïatreilang na ka bynta ban kyntiew ïa ka party ha ka thaiñ Nongpoh bad ka jylla baroh kawei.