Mawkyrwat, Rymphang, 18: Kum shibynta ban pynsngewthuh, pyni ne ban ai jingtip halor ki jingkhuid jingsuba jong ka General Election ka ban sa long ha une u bnai Rymphang, 2023, ka ophis jong u District Election Officer, South West Khasi Hills District, Mawkyrwat mynta ka sngi ka la pynlong da ka jingpyni ïa ka drama lyngkot ha ïew Mawkyrwat ba la leh bad ïa shimbynta da ki khynnah skul jong ka Jawahar Navodaya Vidyalaya (JNV), South West Khasi Hills District.
Ka Drama lyngkot ba la ai da ki khynnah skul jong ka Jawahar Navodaya Vidyalaya (JNV), South West Khasi Hills District ka dei ka, “Free and Fair Election”.
Ka Jylla Meghalaya kan sa leit sha ka elekshon ban jied ia ki nongmihkhmat ba thymmai ha ka 27 tarik mynta u bnai. Ka jingpynbna ia ka result kan long ha ka 2 tarik, Lber, 2023. Ki don 375 ngut ki kyrtong ki ban aireng ha kane ka elekshon. Na kine, 339 ngut ki dei ki kyrtong shynrang bad 36 ngut ki kyrtong kynthei.
Ha kane ka sngi la wan ïashimbynta lang ruh da u bah W.L. Snaitang, Secretary jong ka Shnong Mawkyrwat ha kaba u la ai ruh ki kyntien jingpynshai khyndiat halor ka jingthmu jong kane ka prokram bad uba la shim ruh kum nongpynïaid bad uba la ai ruh ki kyntien jingkhublei.
Kiba la wan ïa shimbynta ha kane ka sngi ki kynthup ruh ïa ki nonghikai, ki khynnah skul bad ki nongtrei napoh ka ophis jong u District Election Officer, South West Khasi Hills District, Mawkyrwat.
