Da ka 3rd Maitshaphrang Excellence Academic Award pynkup burom ka KSU ïa 28 ngut ki samla pule

Nongpoh, Rymphang 21: Kum ka jingpynshlur ïa ki samla pule ba kin dang bteng ban leh bha haki jingpule ba kham shalor, ka KSU Umden Unit sa shisien pat kala ioh ban pynkup burom ïa kumba 28 ngut ki samla pule kiba la wan shakhmat haka eksamin SSLC, HSSLC, Graduate bad Post Graduate, naka thaiñ Umden da ka 3rd Maitshaphrang Excellence Academic Award.
Ha kane ka juh ka sngi la ioh ruh ban pynhap pyrda syndon ïaka 3rd Maitshaphrang Knock Out Football Tournament bala pynlong da ka KSU Umden Unit hadien ka jingïakhun phainal kaba la long hapdeng ka Shipara SC pyrshah ïaka Umden SC ha kaba ka kynhun ïalehkai jong ka Shipara SC ka la iohrah ïa ka nam lahduh da kaba pynliem noh ïa ka Umden Sport Club da 5-4 kol ha ka jingïakhun kaba la poi sha ka tie breaker.
La wan ruh ban sakhi ha katei ka sngi da u Samla Pynshai Rani Publicity Secretary ka KSU sengkmie kum u kongsan, u samla Ferdynald Kharkamni President ka KSU North Khasi Hills District kum u symbud kongsan, u samla Toning Lapang President ka KSU Umden Unit bad kiwei kiwei ki nongïalam bad ki riew rangbah naka thaiñ Umden.
Haba kren ha katei ka jingïalang ban pynhap pyrda noh ïa katei ka jinglehkai phutbol bad ka jingpynkup burom ïaki samla pule naka liang u Samla Pynshai Rani u la ai ka jingkhublei ba kyrpang ïa kitei ki 28 ngut ki samla pule kiba la ioh pdiang ïaki khusnam ba ka seng ka ju pynshlur man u snem ïaki samla pule bad kumjuh ruh ïa ki 2 kynhun ïalehkai phutbol kiba la poi shaduh ka thup phainal bala lah ruh ban pynhap pyrda syndon hadien ka jingïakhun kaba jur.
Naka liang u Samla Pynshai u la sneng la kyntu ruh ïakitei ki samla pule bad kumjuh ruh ki samla ïalehkai ba kin im ka jingim ba tipsngi, ba don akor, ban burom ïa kiba halor khamtam ban minot thop haka jingpule ki jong ki namar ka jingstad kaba la ai da ki kmie ki kpa yn nym lah ban thied da ka pisa, bad kum ki samla ki dei ban stad bad kiar lai lum lai wah na u drok u ba la sdang ban pynjot ïa kiba bun ki khun samla ka ri bad ka jingjot jong ka jaitbynriew baroh kawei bad kim dei ban ngop haki jingpynshoi.
U Samla Ferdinald Kharkamni haba kren ha katei ka sngi u la ban jur ba ki kum ki samla ki dei ban long ki samla kiba don ka jingkitkhlieh ban minot thop haki jingpule, khamtam ban long ki samla kiba long ka nuksa jong ka pateng ban wan ba ka jaitbynriew kan dang kiew irat ha baroh ki liang.
Kum u samla u ba bat ruh ïaka lyngkor kum u nongïalam ka KSU u la pynpaw ka jingsngewkhia kaba jur halor ka jingkynrei u drok ha kane ka ri khasi jong ngi, da kaba kyntu ruh ïaki samla ha katei ka sngi ba kim dei ban ktah bad khot ruh ka jingïatreilang naduh ki kmie ki kpa, ki nongïalam shnong ban rat diengkhong ban pynduh jait ïa u drok bad ki kam sniew naka imlang ka sahlang.