Tuid ki paidbah sha ka rally sngewlem ba shah pynïap ka longkmie ha Riangpoit Thymmai

Nongstoiñ, Rymphang 21: Ka jingshah pynïap dusmon jong kawei ka longkmie ka (L) kong Metilda Lyngdoh Marshilong na ka shnong Riangpoit thymmai ha ka 14 tarik mynta u bnai ha uwei u runar ka la pynshongsyier ïa ki paitbah jong ka shong ka thaw bad ki shnong ba marjan.
Kumta kum ka dak jong ka jingpynrem bad ka jingpyrshah kaba jur halor katei ka kam bymman, ki paitbah jong ki shnong kiba don hakatei ka thaiñ naduh Risiang, Nongtraw, Mawlait, Riangpoit, Maweitksar bad kiwei kiwei ha ryngkat ka jingïaytreilang bad ki sengbhalang jong ka thaiñ ba kynthup ïa ka FKJGP, KSU bad ka HANM, ki Village Organisation, ki VDP ki nongsynshar shnong bad kiwei kiwei ki kynhun, ha ka sngi hatmajai ka 21 tarik Rymphang, ki la pynlong da ka jingïaid proseshon da kaba rah ruh da ki placard kiba la thoh ïa ki kyntien pynrem ïa utei u riew thrang snam u ba la leh ka kam sang bad shim syndon ka jingim katei ka longkmie.
Ïa katei ka jingïaid proseshon la sdang narud shnong ka Riangpoit haduh ban da poi ha madan jong ka skul ha kaba da ki spah ngut ki paitbah naduh ki longkmie, ki rangbah, ki samla bad ki khynnah skul ki la wan ban ïashim bynta bad ban pyrta da kawei ka sur ban dawa ba ki bor ka aiñ ki dei ban pynshitom da kaba tyngeh ïa u riew runar.
Haba la poi ha katei ka madan la pynlong ïa ka jingïalang ha kaba la pynïaid da u bah Pius Puweiñ sordar jong ka shnong Riangpoi Thymmai, la ïoh ïa ka jingkren na ki rangbah ba kynthup ïa u secretary jong ka shnong Riangpoit, u hynmen jong katei ka longkmie kaba la shah pynïap dusmon, ki nongïalam jong ki sengbahlang bad na ka kong Sencyful Dkhar ka nongïalam jong ka Catholic Women Commission Nongstoiñ Dioceses.
Kong Dkhar haba ai jingkren ka la pynkynmaw ba ka jingshah thombor jong ki longkmie kam long shuh kaba dang thymmai, hynrei ka dei ka jingjia kaba la ïoh sngew man ka por bad kaba la pynrit mynsiem ïa ki longkmmie ha man la ki jaka. Hynrei kaba sngew shyrkhei pat ka long ba naduh ba ka la sdang ban kynmaw haduh ba kan da kynjoh palat sawphew snem ka karta ym pat ju ïohnsngew ba kiba kum kitei ki jait kam bymman ba ki jia ha katei ka thaiñ.
Ka la ong ruh ba ki don bun jait ki jingshah thombor jong ki longkmie ym tang ha ki riew runar kiba na bar, hynrei wat ha la ki jong ki kurim ruh. Ha kajuh ka por ka la ong ba kiba kum kitei ki jingshah thombor ka dei namar ba ki shynrang la ki dei kiba dang samla ne ki ba la rangbah ruh, ki peit poh ïa ki kynthei namar ki dei ki bym don bor.
Ka la ong ba ha ka dustur jong ka jaitbynriew Khasi Pnar, ki shynrang ki dei ki nongïada ïa ki kynthei bad baroh ki kynthei ki shaniah lut ha ki shynrang la ka trei ka ktah ban bsa ïa ka ïing ka sem, ha ka kamai kajih bad ha baroh ki liang. Pynban ki kynthei ki dang shah lehbeiñ ha kiba bun rukom ha ki shynrang kat haduh ba ka la pynartatien ba kin shanniah. Ka la kyntu ruh ba ki shynrang ki dei ban da pyrkhat bha namar ka kynthei ka dei kaba pun ba kha ïa ki khun ym u shynrang.
Ka la kyntu ruh ba ki longïing longsem ki dei ban hikai ïa ki khun ki kti naduh ba ki dang rit, ba kim dei ban ailad ïa ka jingkwah brai ha ka doh namar ynda ki la kham san kin sa kylla long ki runar kiba shyrkhei.
Ha katei ka sngi ki paitbah kiba la poi ha ka jingïalang ki la dawa ba ki bor ka aiñ ki dei ban pynsaja da kaba tyngeh, namar lada dang pyllait ïa utei u runar ki paitbah naduh ki rangbah, ki kynthei khynnah ki don ha ka jingshong syier bad ka jingsheptieng kaba khraw. Kumta dei ban set phatok shi jingim ïa u runar u ba la leh ïa katei ka kam pohjait poh rati ka bym lah ban pdiang ha ka imlang sahlang.