Ka Jirang ka la shah iehnoh beiñ la bun phew snem, ki kam pynroi ki wan hadien ba nga long MLA: Sosthenes
Nongpoh, Rymphang 21: Haba pan ka jingkyrshan kaba radbah na ki paidbah ka Jirang Constituency ban pymjop biang ïa u kum u kyrtong ka party NPP na Jirang Constituency ha ka jingïalang ïalap election mynta ka sngi ha Byrnihat, u Bah Sosthenes Sohtun u la pynshai sha ki paidbah da kaba ong, “Ka Jirang Constituency ka la shah iehnoh khunswet bad shah iehnoh bein ha ki kam pynroi la bun phew snem mynta, hynrei dei hadien ba ki paidbah ki la pynjop ïa u kum u nongmihkhmat ha ka election 2028 ba ka Jirang Constituency mynta ka la ioh pdiang shibun ki kam pynroi kiba la ai jingmyntoi na ka bynta ki paidbah ka Jirang Constiteuncy”.
Kum u kyrtong ka NPP Party na Jirang Constituency, u Bah Sosthenes Sohtun, u la ong ba kum u nongïalam u da sngewkmen shisha ba ki paidbah ha ka election 2018 ki la pynjop ïa u ban long uta u nongmihkhmat bad bun ki kam kiba u angnud ban wan rah ka jingkylla tang hapoh ka san snem ki la urlong namar ka jingduh thiah duhdem jong u ban ïasaid na ka bynta ki jingdonkam ki paidbah hapoh ka Jirang Constituency.
U la ong ruh nga dang don shibun ki jingangnud ban wan rah ïa kita ki jingdonkam jong ki paidbah ka Jirang Constituency kiba um lah ban pyndep tang hapoh ka san snem, hynrei lada ki paidbah kin dang pynjop biang ïa u ha kane ka election 2023 un dang shim khia ban wan rah ruh sa shibun ki kam pynroi kiba dang donkam hapoh kane ka Constiteuncy.
Ha kawei ka bynta, u Bah Sosthenes Sohtun u la ther tyngeh ruh ïa kiwei ki nongïalam na kiwei ki political party kiba la pyrshang ban ïalam bakla ïa ki paidbah bad ban wan rah ka jingsngewïapher jaid byrniew da kaba kyngoh ba lada ka NPP ka wan biang ha ka bor kan nym ai shuh ki jingïarap ne ki jingmyntoi sha kito kiba ym dei ki Khasi bad Garo (Non tribal) bad baroh kine ki jingkynnoh bad ki jingïalam bakla ki dei tang ban ïalam bakla ïa kiwei pat ki jaid bynriew ha kaba kum u nongmihkhmat um shym la mihkhmat ïa kano kano ka jaid byrniew bad shisien ba ki la pynjop u hap ban peit krypang ïa baroh ki nongshong shnong khlem da peit na kano ka jaid bynriew ba ki wan, u la bynrap.
Namarkata, na ka liang u Bah Sohtun uba dei u kyrtong ka NPP party u kyrpad ïa ki paidbah ba kim dei ban shah ïalam bakla ha kiwei kiba wan ban ïalam bakla ïa ki jingmut jingpyrkhat jong ki bad ha kane ka kynti ki dei ban ai ka jingkyrshan kaba pura ïa ka NPP ha kaba lada ka NPP ka wan biang ha ka bor kan dang lah ban leh shibun ki kam kiba khraw kiba ai kata ka jingmyntoi ïa ki paidbah ka Constituency bad ha ka jylla hi baroh kawei, u la bynrap shuh shuh.
Lyngba jong kane ka sngi ba la pynlong ïa kane ka jingïalap election paidbah u kyrtong ka NPP ha Byrnihat, la sakhi lang ruh da ka jingdon lang u MDC ka Jirang, u Bah Victor Rani, u President ka NPP Ri Bhoi, u Bah Clement Mawlong, u Bah Thomas Malai, u Bah Nikle R. Marang bad kiwei kiwei bad ka jingwan poi ki paidbah da ki hajar ngut ka la ai mynsiem ïa une u kyrtong ka NPP ba u don ïa ka jingkyrmen ba un jop biang na kane ka Constituency.
Na kane ka jingïalang ïalap election ka jingwan pynïasoh ki nongïalam na ka BJP, Congress bad UDP ka la ai jingkyrmen ruh ïa u kyrtong ka NPP, hadien ba ki la ai rai ban ïa trei tyngeh na ka bynta ban jop ïa u kum u kyrtong ka NPP na Jirang Constituency.