Byrngem khang tala ka FKJGP ïa ka ophis Printing and Stationery

0

Shillong, Nohprah 21: Ka Federation of Khasi Jaintia and Garo People (FKIGP) ha ka sngi Balang ka la byrngem ban leit khang tala syndon ïa ka ophis u Director ka Printing and Stationery lada ka sorkar kam sospon ne pynkynriah kam shipor sha kawei ka tnat ïa u Director ba mynta ka tnat u Salgira R Marak halor ka jingkynnoh bamsap ïa u kaba la palat 2 klur.
Haba kren sha ki lad pathai khubor u Assistance General ka FKJGP u Bah Reginal Thabah u la ong ba ka seng ha ka dorkhas kaba la ai sha u Myntri Rangbah ka jylla ha ka sngi Ba-ar ka la kdew shai ba ka seng ka aipor ïa u Myntri Rangbah bad ka sorkar ba dei ban sospon ne pynkynriah shuwa sha kiwei ki tnat na ka kam ba u bat mynta ïoh ba un pyndam lut ïa ki sakhi satar kiban ieng sakhi pyrshah ïa u halor ka bamsap kaba la paw ha ka RTI.
“Lada ka sorkar kam sngap ïa ki jingdawa jong ka seng na bynta ka jingbit jingbiang ka kynhun tohkit bad ba ka jingtohkit ruh kan long kaba khid ngim banse ban leit khang tala ïa ka ophis u Director,” u la byrngem.
U la ong ruh ba ha ka jingshisha kat kum ki kyndon ka Meghalaya Civil Service Rule 2020 ka kdew shai ba uno uno u ophisar uba shah tohkit lyngba ka Departmental Proceeding u dei ban shah sospon shipor ne pynkynriah sha kawei ka tnat khnang ba un ym ïoh lad ban pyndam lut ïa ki sakhi sabut kiban pynshisha ïa ka jingbamsap jong uta u ophisar ba shah kynnoh.
U la ong ruh ba ïa ka jingtohkit la peit da u Dr Shakil P Ahammed hadien ba la pynkynriah noh ïa ka Kong R Lyngdoh.
U Bah Reginal u la ïathuh ba kane ka jingpyndonkam bakla ïa ka pisa da u Salgira R Marak ka la paw ha ka CAG report bad kumjuh kakum ka Right to Information (RTI) ba la pan da u Bah Egenstar Kurkalang.

Leave A Reply

Your email address will not be published.