Bym kitkhlieh ka MePDCL, ker jingker ka HYC Mawthawpdah Area Unit ïa u transformer ha Photjalei

Mawkyrwat, K’lyngkot 13: Ka Hynñiewtrep Youths Council (HYC) jong ka Mawthawpdah Area Unit da ka jingsngewkhia ka ïoh ban leit ker jingker ne fencing ïa ka jaka buh ïa u transformer ha ka shnong Photjalei, South West Khasi Hills District.
Ka jingthmu ka long jong ka HYC Mawthawpdah Area Unit ban leit ker jingker ïa ka jaka buh ïa u transformer ka long ban ïada ïa ka mynsiem briew, khamtam eh ïa ki khynnah rit ban lait na ki jingjia ba sngewsih bad ban ïada ruh ïa ki jing ri jingdup na ka jingshah bat ha ka bording.
Kawei de ka phang ka long ban pynbor ïa ka ophis MePDCL jong ka Mawkyrwat Division ba kan ker fencing lut ïa baroh ki jaka buh ïa ki transformer ki bym pat ker kiba don hapoh ka thaiñ Mawthawpdah.
Ha kane sngi ka la don lang naduh u bah Boniface Shangpliang, President ka HYC Mawthawpdah Area Unit, ki para dkhot ka HYC bad u Myntri Shnong Photjalei, u bah Nestor Kharmaw.