Shah jied 8 ngut ki khynnah skul ka jylla kiba don sap kyrpang ban pyntbit ha ki kam pule

0

Shillong, K’ Lyngkot 13: Ka Directorate of School Education and Literacy, Meghalaya, ha ka jingïatreilang bad ka Aga Khan Academy Hyderabad (AKAH), ka la pynlong ïa ka jingwad ïa ki khynnah kiba don ki sap ne ka Talent Identification Programme ha ka sien kaba ar kaba dei ka snem mang tyngka 2022-23 bad ka 2024-25.
Kane ka programme ka thmu ban ithuh ïa 4 ngut ki khynnah skul kiba dang pule ha ka Class VI kiba don ki sap ba kyrpang na Meghalaya bad ban ai khusnam da ka jingïarap pynshong skul khlem da la pynlut haduh ba kin da poi ha ka klas kaba 12, bad ka bai bam ne scholarship kawei kawei kaba la kot haduh T. 1 klur na ka bynta kine ki khynnah skul.
Lah ban kdew hangne ba kane kadei ka sien kaba ar ba ka Aga Khan Academy, Hyderabad, ka la pynlong ïa kane ka prokram ha ka snem mang tyngka ne Financial Year ka snem 2024-25, ban jied ïa 4 ngut ki khynnah skul bad ban ai ïa ki da ki scholarship. Ka sien kaba nyngkong ka dei kaba la leh ha ka snem 2022-23, ha kaba 4 ngut ki khynnah skul ki la shah jied na Meghalaya, ha kaba kane ka la wanrah ïa ka jingdon jong baroh ki khynnah skul kiba la shah jied baroh sha ka 8 ngut na ka jylla.
Ka Aga Khan Academy Hyderabad, Talent Identification programme ka ithuh ïa ki khynnah skul kiba don ki sap ha ka jingpule bad kiwei ki sap kiba wan na ki longïing kiba tlot ha ka ïoh ka kot da ka jingthmu ban ai ha ki ka lad ha ka pule puthi khamtam kito ki khynnah kiba la ïoh ka sap ba kin pynïar, kin kiew bad kin tei ïa ka imlang sahlang.
Ka jingtreikam ka Academy ka long ba kan wad ïa ki khynnah skul ha ki skul sorkar ne ki skul ki bym ïoh jingïarap na ka sorkar ban jied ïa ki khynnah skul kiba don ki sap ba kyrpang ha ki kamra klas jong ki khnang ban ithuh ïa kiba don sap kiba pule naduh ka klas kaba 6 na ki thaiñ bapher bapher ha kylleng ka ri India bad ka pyrthei. Ka Aga Khan Academy Hyderabad ka dei ka International Baccalaureate (IB) World School.
Ïa ki Talent Identification screening test la pynlong ha ki 3 bynta. Hapoh ka school level, haba manla ki skul ki jied ïa u ne kawei ka khynnah kaba stad bha na ka klas VI ban shim ruh ïa ki jingkhmih bniah.
Ka jingleh screen ha kaba sdang la leh da ka Office ka Directorate of School Education and Literacy, Meghalaya, da kaba pyndonkam ïa ka MLENS (Meghalaya Learning Enhancement Network System) kaba dei ka rynsan khmih bniah. Ha kane ka snem ki la don haduh 358 ki khynnah skul kiba la wan na ka bynta ka jingkhmih bniah, ha kaba na kine, kumba 209 ngut la jied bad la aiti sha ka Aga Khan Academy ba kan nangjied shuh shuh ïa ki.
Ka rukom jied jong ka Aga Khan Academy, Hyderabad ka don ruh ha ki 4 bynta ha kaba ha ka Stage 1- ka Non Verbal Ability (Written Exam), Stage 2-Maths & English (Written Exam), Stage 3- Problem Solving & Dynamic Assessment (Written Exam & Interview) bad ka Stage 4 – ka dei ka Interview.
Na ka liang ka Academy ka la pynlong ïa ka jingleh screen ïa ki 209 ngut ki khynnah skul ha kaba na kine la jied tang 20 na ka bynta ka interview kaba khatduh. Ha kaba khatduh la jied tang ïa 4 ngut kum ki AGK Finalist napdeng kitei ki 20 ngut da kaba pynshong nongrim halor ki jingïoh kyrdan jong ki ha ki bynta bapher bapher.
Ki 8 ngut ki khynnah pule kiba la shah jied bad kiba la long ka Aga Khan Finalist ki ban ïoh na ka scholarship ha ki snem ba la buh ki long, na West Khasi Hills, Nongstoiñ, Mawrang Upper Primary School la jied ïa u Kheinkor Marthong na ka bynta ka Phase 1-Talent Identification Programme FY 2022-23. Nangta na West Khasi Hills, Nongstoiñ napoh ka skul St. Xaviers Secondary School la jied ïa u Banteibok Marwein.
Shuh shuh na West khasi Hills Nongstoiï na St. Peters Higher Secondary School la jied ïa u Jefferson Pariong, na East Khasi Hills Shillong na Dr. Radhakrishna Boys Secondary School la jied ïa u Anubhav Dey, na West Khasi Hills Nongstoiñ napoh ka skul Sibsingh Memorial Govt Higher Secondary School la jied ïa u John Kennedy Puwein na ka Phase 2-Talent Identification Programme FY 2024-25, napoh ka East Khasi Hills Shillong, na ka skul Shillong Public School la jied ïa u E-phrangdame G. Pariat, nangta na West Jaiñtia Hills Jowai napoh ka Govt Public School Jowai la jied ïa u Wamon War bad na East Khasi Hills Shillong napoh ka Shillong Public SS la jied ïa u Rangkynjai J Tariang.
Haba ïadei bad kane na ka liang u State Project Director, Samagra Shiksha, Director of School Education and Literacy, Meghalaya Shillong u Swapnil Tembe, IAS u la ong ba ka tnat ka la pynpaw ïa ka jingsngewhun halor kane ka programme bad ka angnud ban bteng ïa kane ka jingïatreilang bad ka Aga Khan Academy Hyderabad ha ki por ban sa wan naba ka la long ka jingmyntoi ïa ki khynnah skul.

Leave A Reply

Your email address will not be published.