Ka Congress ka don ki kyrtong kiba la rim bad kumjuh ruh kiba dang thymmai, ong u President ka MPCC

Shillong, K’ Lyngkot 13 : Ka seng Congress ha ka sngi Saitjaiñ ka la pynlong ïa ka jingïalang jong baroh ki kyrtong ki ban ïakhun ia ka elekshon MDC sha KHADC bad JHADC ha ka 21 tarik u Rymphang bad ha kane ka jingïalang ki nongïalam jong ka party ki la ai ki jinghikai ïa ki kyrtong kumno ki dei ban kren ha ki sngi ïalap elekshon jong ki.
Hadien ba la wai kane ka jingïalang haba kren bad ki lad pathai khubor u President ka Meghalaya Pradesh Congress Committee u Bah Vincent H Pala u la ïathuh ba ka seng kam shym la buh ïa ka manifesto namar ha elekshon ADC ki rukom treikam ki ïapher na ka KHADC bad ka JHADC kumta kam don satia ka jingpynmih ïa ka manifesto, tangba ha ka jingïalang la batai ïa ki mat sha ki kyrtong kumno kidei ban kren ïa ki phang haba ki leit ban ïalap ïa ka elekshon ha la ki jong ki jong ki constituency.
“Ha kane ka jingïalang na ka liang u Bah P N Syiem bad u Bah Manuel Badwar ki la ai ki jinghikai kiba biang bha sha ki kyrtong jong ki constituency bapher bapher bad ki kyrtong ki la ïoh ki jinghikai bad jingshai kiba bun jait kiba kynthup ïa ki rukom treikam kiba rim bad kumjuh ruh kiba thymmai,” ong u Bah Pala.
U la ïathuh ha kane ka kynti kaba mynta ka Congress ka la don ki kyrtong kiba dang samla bad ki don ruh kiba la rim bad kiba thymmai kiba la long kum ki kyrtong. “Ngi donkam ïa ki nongïalam barim kiba kynthup kum ïa jong u Bah P N Syiem kiba dei kiba la tbit bha ha kane kam ban long kum ki MDC bad kumjuh ruh ki kyrtong kiba dang samla bad kiba thymmai kiba don shibun ki jingmut kiba thymmai kiba long ka jingmyntoi ïa ka party ban pyntyllun ïa ki kam ha kane ka jingïakhun ïa kane ka elekshon sha ka ADC,” ong u Bah Pala.
Lah ban ong ba u nongïalam ka Congress u la ïathuh ba ka party kan sa leit sa sha Jaiñtia Hills ban pynlong ïa ka jingïalang mynta u taïew na ka bynta ban pynbeit ïa katto katne ki kam ha kaba ïadei bad ki kam ban sei kyrtong ha kane ka thaiñ.