Bun ki nongkynthoh tang ban pynlong daw elekshon, u Bah Dasakhiat u la leh bha ïaka Mawhati Constituency : ong ki nongïalam

Nongpoh, Rymphang 18: Ki nongïalam ka NPP Mawhati mynta ka sngi kila mih shakhmat ban pynpaw ba u Bah Dasakhiatbha Lamare u ba dei u nongmihkhmat ka Mawhati u ba la mih noh ban leit aireng ïalade na Nongkrem Constituency ha kane ka elekshon ba mynta u la trei bha shaba palat ïaka Mawhati ha kaba ki skhim pynroi kila poi palat 300 klur khamtam ki surok, hadien ki jingkynthoh ba bun ki liang tang ban pynlong daw elekshon.
Haba kren sha ki lad pathai khubor naka liang u Bah Donbok Kharnaior u ba bat kum uwei naki nongïalam ka NPP ha Mawhati Constituency bad u Bah J Kharkongor Rangbah Shnong ka Mawhati kila pynpaw ka jingshah kynthoh jong u Bah Dasakhiatbha Lamare ka dei tang ka ñia bad ban pynlong daw elekshon ha kaba ki kam pynroi khamtam ki surok ba kongsan tam haduh mynta ki dang ïaid shaid shaid ha Mawhati naduh ka surok Umshiaw- Umtangling, Umsning-Sonidan, Liarbang-Thadrang bad kiwei kiwei.
U la ong ruh ba u Bah Dasakhiabha Lamare haka jinglong MLA jong u, u la leh shibun ki kam ban wanrah ïaka roi ka par haka thaiñ Mawhati naduh ki surok, ki jaka pule, ka koit ka khiah bad kumta ter ter kaba ym pat ju ioh nongmihkhmat ban shimkhia naka bynta ka jingeh jong ki paidbah kaba dei ka jingkyrkhu kaba khraw ïaki paidbah jong ka Mawhati baroh kawei.
Kumba u Bah Dasakhiatbha Lamare mynta ka kynti u la leit ban aireng ïalade na Nongkrem Constituency naka liang kitei ki riew rangbah ki phah ruh ka kyrwoh sha ki paidbah ka thaiñ Nongkrem ba kim dei ban ngeit biej haki riew shim kabu, kumba ka Mawhati kala ioh mad shibun ki jingkyrkhu haka jinglong MLA jong u, hynrei kaba sngewsih ka long bun naki riew shim kabu ki pynbudnam ïaka kyrteng u Dasakhiat ba u khlem leh eiei ha kine ki 5 snem bad katei ka long kaba bakla, kila bynrap.