Ka Meghalaya kan sa kiew ha ki kam pynroi kumba long ka Assam hapoh ka jingsynshar ka BJP: Himanta Sarma

Shillong, Rymphang, 17: “Ka Meghalaya kan sa sakhi ïa kijuh ki kam pynroi kumba ka BJP ka don mynta hapoh ka jingsynshar jong ka BJP,” ong u Myntri Rangbah ka Jylla Assam u Himata Biswa Sarma haba kren ha ki jingïalang kiba la long ha Mahendraganj, Rongjeng, Mendipathar bad ha Kharkutta ha ka sngi Saitjaiñ.
Ïa u Hmanata Sarma la pdiang burom da ki hajar ngut ki paidbah ha kine ki saw tylli ki jingïalang ha kane ka sngi.
Haba pan jingkyrshan na ki paidbah ban ai vote ïa ka BJP bad ban pynjop ïa ki kyrtong jong ka party ha ki Constituency bapher bapher, u Himanta u la ai nuksa ruh ïa ki song pynroi kiba la theh da ka Sorkar Jylla ha Assam kumba long ha Meghalaya.
U la ong ba ki jingmyntoi jong ki skhim ba kongsan ki long kum ka PM Awas Yojna kaba la pynmyntoi tang ïa ki katto katne ha Meghalaya haba ïanujor bad ha ka jylla Assam. U la ong ba kine ki skhim kin sa poi hok sha ki paidbah lada ka Sorkar BJP kan ïoh bat ïa u lakam synshar ha ka jylla ha kaba yn sa rat dyngkhong ïa ka jingbamsap.
U Himanta Biswa uba long ruh u Chairman jong ka North East Democratic Alliance (NEDA) u la kren shaphang ka Arun Uday Scheme kaba la treikam pura ha ka Jylla Assam. U la ïathuh, hapoh kane ka skhim, kawei ka kynthei bym pat shong kurim lane kano kano ka longkmie ba la kham tymmen na kawei pa kawei ka longiing ba hap hapoh u laiñ ka jingduk ki ïoh jingïarap pisa kaba T. 1200 manla u bani. Palat 35 lak ngut ki kynthei ki la ïoh jingkyrshan na kane ka skhim ha Assam manla u bnai. U la ong, ka BJP ka pun jingkieng ïa kane kajuh ka skhim ban ai jingmyntoi wat ha ka jylla Meghalaya, lada ka ïoh bat ïa u lakam synshar.
“Ka Sorkar BJP ha Assam ka la kular ban ai kam sha ki 1 lak ngut ki samla ha u snem baladep. Na kine, 50,000 hajar ngut ki briew ki la ïoh ïa ki shithi thungkam, bad ïa kiba dang sah yn sa thungkam shwa u bnai Jymmang mynta u snem. Ki samla jong ka Jylla Meghalaya ki la mad jingeh na ka daw ka jingbym ïohkam ïohjam bad dei tang ka BJP kaba lah ban wanrah ïa ka roi ka par kaba lah ban pynkha ïa ki kam ki jam ha kane ka jylla,” ong u Himanta.