Ryngkat ki jingkular, ïalap elekshon u National Vice President ka BJP ïa u kyrtong BJP Mawhati ha Umsohlait

Nongpoh, Rymphang 18: Ban pan jingkyrshan na ka bynta ban pynjop ïa u kyrtong ka BJP na Mawhati Constituency ha kane ka election jied nongmihkhmat jong u snem 2023 sha ka ïing Dorbar thaw aiñ ka jylla, u National Vice President ka BJP ha ka sngi Thohdieng u la wan ban ïalap election kyrpang na ka bynta u kyrtong ka BJP na Mawhati, u Dr. Evarist Myrsing ha ka jingïalang kaba la long ha ka Shnong Umsohlait ha Ri Bhoi.
Na ka liang u National Vice President ka BJP, u Dr. M. Chuba Ao u la wan ruh ban ïalap election da ka Chopper, ha kaba ki paid nongkyrshan ka party BJP ki la wan ban sngap ïa kane ka jingïalap election ryngkat shibun ki jingkular kiba ka party BJP kan pyntreikam lada ka wan ha ka bor.
Ha kane ka sngi la sakhi lang ruh da ka jingdon lang u kytong ka BJP, u Dr. Evarist Myrsing, u President ka BJP Mawhati Mandal, u Bah Shanborlang Rympei rygnkat kiwei kiwei ki nongïalam ka party BJP na ka jylla bad na Ri Bhoi District.
Haba pan ka jingkyrshan na ki paidbah ka Mawhati Constituencu ban pynjop ïa u kyrtong ka BJP ha kane ka election 2023 ban mihkhmat na ka Mawhati Constituency, u Dr. M. Chuba Ao u la ai khublei kyrpang ïa baroh ki nongkyrshan ka BJP bad ha kajuh ka por kum u National Vice president u la kyrpad jur ban pynjop ïa u kyrtong ka BJP ha kaba lada ka paty BJP ka wan ha ka bor kan lah ban wan rah shibun ki jingkylla hapoh ka Mawhati Constituency bad ha ka jylla hi baroh kawei.
U la ïathuh ruh ba ka BJP ka la dep ruh ban pynlait ïa kata ka Vision Document ha kaba ki skhim bapher bapher kan pyntreikam hapoh ka jylla Meghalaya bad lada ki paidbah ka jylla Meghalaya ki kwah ban wan ka jingkylla ki dei ban ai ka jingkyrshan ban wan ka BJP ha ka bor khnang ba baroh ki jingangnud ki paidbah kin lah ruh ban urlong hapoh ka jylla Meghalaya.
U la pynpaw ruh ki paidbah ki sakhi wat ha ka por jong ka khlam COVID-19 ba ki nongshong shnong ka ri India hi baroh kawei ki kynduh mawsiang, hynrei dei u Myntri Rangbah ka ri, u Narendra Modi uba don ka jingiohi jngai ban ïarap kyrpang ïa ki paidbah ha kaba la sam ïa u khaw sha man la ki longïing ba ki longïing baduk hapoh ka ri kin lait na ka jingshah thngan.
“Ngi la lait im ruh na ka jingwan lynshop ka khlam COVID-19 ka dei namar ka jingshim khia ka sorkar BJP ha ka jingïalam u Narendra Modi kum u myntri rangbah ban pynioh ei ïa ka injekshon (Vaccination)” ong u Dr. M.Chuba Ao bad bynrap ruh da kaba ong ba ka sorkar BJP wat la kiwei ki pyrshang ban ber bih ban ïalam bakla ïa ki paidbah bad kum ka party ka la leh ïa kaba bha tam khamtam ban ïarap na ka bynta ki longing longsem baduk lyngba ki skhim bapher bapher.
Kum u National Vice president ka BJP, u Dr. M. Chuba Ao ha kane ka sngi u la kular ruh ba ka BJP kan phai khmat kyrpang sha ka jylla Meghalaya lada ki paidbah ki kloi ban kyrshan ban wan ha ka bor bad ki katto katne ki jingkular kiba ula kular ki kynthup ban ai jingnang jingstad kyrpang ïa ki khun kynthei khlem da siewdor naduh ka Klas- KG haduh ka Post Graduate. Ka jingkular ban pynkhiew noh ai ka PM Kisan na ka T. 6000 sha ka T. 8000, ban ïarap kyrpang ïa ki Longkmie bym don lok haduh T. 24000 shisnem, ban ïarap ïa ki nongrep bym don jaka T. 3000 bad kumjuh ruh kiwei kiwei ki kam pynroi khamtam ka sorkar BJP ka la sdang ruh ban pyntreikam sa ïa ka 7 pay commission hapoh ka ri India.