Nongpoh, Naiwieng, 17: Ka ophis u Deputy Commissioner ka Ri Bhoi lyngba ka kyrwoh ba la phah da u Additional Deputy Commissioner ka Ri Bhoi bad uba dei ruh u CEO ka DDMO la pyntip ba la don ka jingbthah sha ki BDO lane ki tnad treikam sorkar ba dei ban long kiba peitngor na ka jingkylla kynsan ka bor mariang kumba mynta ha Central Bay of Bengal ka la don lypa ka jingbtah ba kan don ka jingjur u lapbah lane ka jingpynjot jong ka bor mariang kaba lah ban shah ktah ïa ki paidbah bad ki nongrep.
Kane ka jingpynmih ka ophis u Deputy Commissioner ïa kane ka kyrwoh da kaba la bthah lypa khamtam ïa ki Block Development Officer ha Ri Bhoi ban long kiba peitngor na kane ka jingkylla ka bor mariang, ka dei hadien ba la don ka jingpyntip lyngba ka Ministry of Home Affairs, Disaster Management Division (National Emergency Response Centre) ba ki bynta jong ka Central Bay of Bengal ki dei kiba shah ktah lada jur u lapbah ne ka don ka jingktah kaba lah ban ktah na ka bor eriong.
Kane ka jingïathuh lypa na ki bor ba dei peit ïa ka jinglong jingman ka mariang ba kan don ka jingshah ktah na ka bor mariang bad ka jingjur u lapbah ha Central Bay of Bengal , ka la pynlong ruh ïa ki bor district ka Ri Bho ban shim khia bad ban long lypa kiba la pynkreh namar kane ka lah ban ktah ruh sha kane ka District bad ka jylla Meghalaya.
Kumba la pynpaw ha katei ka kyrwoh lyngba u Additional Deputy Commissioner ka Ri Bhoi, la ong ba ka ophis u Deputy Commissioner ka Ri Bhoi ka la dep ban btah ne pyntip kyrpang sha baroh ki Block Development Officer lane kiwei ki tnad treikam ba dei peit ha kane ka bynta ba kin long lypa kiba peitngor bad ruh ba kin shim khia ban shim ïa ki lad ki lynti ban ïada lypa lada wan kine ki jingjia kiba ktah na ka bor mariang khnang ba kan nym don kano kano ka jingshah ktah ïa ki paidbah ka Ri Bhoi bad khatam ïa ki nongrep ka Ri Bhoi kumba mynta ka dei ka aiom ban lum ban lang jong ki nongrep.
