Nongstoiñ, Naiwieng, 17: Ha ka sngi palei na ka liang ka HYC Mawshynrut circle ha ka jingïalam u President Losbingnel Lyngkhoi, ka la leit ïakynduh ïa u SDO civil sub division ban dawa buh noh da ka Biometric Attendance System (BAS), namar ka jingbym wan biang por ki nongtrei bad ruh ha rukom wai trei khlem biang por hapoh ophis C&RD Block Mawshynrut bad ha ophis Mawshynrut Civil.
Ki nongïalam ki la leit ban ujor ïa kane ka bynta halor ka jingud jingnam ki paitbah nongshong shnong jong ka dong ka thaiñ Mawshynrut baroh kawei, ha kaba la ong ba haba leit donkam ha kitei ki ophis ym ju kham lap nongtrei satia.
Katkum ka jingong ki nongïalam ka seng, la ong ba ka la lap hi ruh hadien ba ka la dep leit jurip teng ha ki ophis bapher bapher kiba don hapoh Mawshynrut Civil Sub division. Hadien ka jingkynduh ïa u SDO, na ka liang jong u lah kular ha ka seng ban u sa shimkhia halor kane ka kam.
