Shillong, Naiwieng 17: Ka Indian School of Business (ISB) ryngkat bad ka sorkar Meghalaya, ki la pynlong ïa ka jingai jinghikai ia ki MLA ka jylla kumno ban nang thaw ia ki polisi treikam
ïa katei ka workshop la pynlong da ka Bharti Institute of Public Policy ha ISB ryngkat bad ka Meghalaya Institute of Governance kaba la sdang ha ka 16 tarik bad kan kut haka 18 tarik u Naiwieng.
U Lamphang ka Jylla Thomas A Sangma ula ïalam ïa ka kynhun ki MLA ka Jylla ba kynthup ïa u Nongïalam ka Liang Pyrshah u Bah Ronnie V Lyngdoh, u Government Chief Whip Bah Nujorki Sungoh bad u Opposition Chief Whip u Saleng A Sangma ryngkat bad ki 35 ngut ki MLA jong ka jylla bad 20 ngut ki ophisar jongka Meghalaya Legislative Assembly bad Meghalaya Institute of Governance.
Katei ka workshops kan ïarap ïa ki MLA ba kin sngewthuh ïa ka jingseng kam kaba kyrpang bad ïa ka jingbei tyngka ha kaba ïadei bad ka jingdon jingem jong ka jylla ha ka liang ki jingthung, ki mrad bad ki sawdong sawkun ki jongka bad kane kan ïarap ruh ïa ki samla ba kin ïoh ïa ka lad ban seng ïa ki kam kiba thymmai.
La ai jinghikai ia ki MLA ha kiba bun ki liang ba kin lah ban kyntiew ïa ka jinglong jingman ha ka jylla khamtam ha ki jaka riewlum bad ha ki thaiñ nongkyndong kiba don ha kylleng ki bynta jong ka jylla.
U Aarushi Jain, Policy Director ka Bharti Institute of Public Policy, ula ai jingbatai shaphang ka Meghalaya Legislative Research Fellowship bad ïa ki kam ki jam ban kyntiew ïa ki constituency.
Ha katei ka workshop ki nongïashimbynta ki la ïoh ïa ka lad ban ïakren markhmat bad ki riewpawkhmat kiba kynthup ïa u Amarjeet Sinha, IAS (Retd.) u Nongaibuit barim jong u Myntri Rangbahduh ka ri, u Venu Rajamony, u Ambassador ka ri India sha Netherlands, u Prof. Ashwini Chhatre uba long u Executive Director jongka Bharti Institute of Public Policy.
U Sampath Kumar, Principal Secretary bad Development Commissioner, jong ka sorkar jylla ula ong, ba u khmih lynti ban lah ban pynkhlaiñ ïa ka jingïadei hapdeng ka sorkar Meghalaya bad ka Indian School of Business bad kane ka workshop kan long ka jingmyntoi bad kan ïarap ha kiba bun ki liang.
Ki MLA kila leit ruh ban jngoh ïa ka T-HUB, kaba dei ka public-private startup ecosystem jongka sorkar Telangana bad ban leit jurip ïaka Telangana State Integrated Command and Control Centre, kaba long kaba kyrpang tam ha ka ri baroh kawei.
