Wan u nonglamktien ka Japan sha Shillong ban pynkhlaiñ ïa ka jingïadei ha ka kolshor

Shillong, Naiwieng 17 : Ban kyntiew ïa ka kolshor ki nong Japan ha Meghalaya bad ban nang pynkhlaiñ ka jingïadei ki ar ri halor ka kolshor bad deiti, ka Japan Caravan ka la sdang mynta ka sngi Thohdieng ha Shillong ïa kaba la ïashim bynta da u Ambassador ka Japan sha India u Hiroshi Suzuki ha ryngkat ki Myntri Sorkar ka Jylla Kong Ampareen Lyngdoh bad Bah AL Hek.
“Ka North East Japan Caravan 2023, ka dei kaba la pynlong lang da ka Japan Foundation, New Delhi bad ka Indian Council for Cultural Relation-North East (ICCR-NE), bad ka la sdang mynta ka sngi Thohdieng bad kan kut ha ka 19 tarik Naiwieng.
ïa kane ka caravan la pynlong ha U Soso Tham Auditorium, Shillong ha kaba u Ambassador ka Japan ula ai jingkren kum u kongsan bad kren ruh halor ka jingnang khlaiñ ka jingïadei hapdeng ka Japan bad ka India khamtam hapdeng ki nongshong shnong.
“Nga kyrpad ïa baroh ba kin wan ban sakhi ïa ka kolshor ki nong Japan ka ban don hangne haduh lai sngi. Ka dei ka sien ba nyngkong jong nga ha Shillong hynrei nga ïohi ïa ka jingïasyriem na ka jingmih ki dieng cherry. Ki paid Japan ki ieid ïa ki syntiew cherry, namar kata nga kwah ban leit sha ka tamasa kaba la pynlong hapoh ka Jylla” ong u Suzuki.