Shillong, Naiwieng, 17: Ha ka jingpyrshang ban wanrah da ki sur jingrwai kum ka bor kaba lah ban wanrah jingkylla, ka National AIDS Control Organisation (NACO) bad ka Meghalaya AIDS Control Society (MACS) Shillong sa shisien kin pynlong biang ha kane ka kynti ïa ka rynsan ïakop rwai kaba la tip kum ka Red Ribbon Superstar Meghalaya Icon 2023. Ka jingthmu ban pynlong ïa kane ka rynsan ïakop rwai ka long ban pynsngewthuh sha ki paidbah halor ka jingshyrkhei jong u khñiang jingpang HIV bad ka AIDS.
Ïa ka Audition na ka bynta ka Meghalaya Icon yn sa pynlong ha Community Hall, Wahingdoh ha ka 30 tarik u Naiwieng, 2023 na ka bynta ban pynsngewthuh halor ka jingpang ïa ki samla kiba dang khie dang san hapdeng ka rta kaba 15 snem haduh 29 snem.
Ki 7 tylli ki kynhun rwai ki ban shah jied lyngba ka Audition ne ka jingpyrshang kin sa ïohlad ban ïashim bynta ha ka Grand Finale ka ban sa long ha madan Polo ha ka 1 tarik u Nohprah 2023.
