Shillong, Naiwieng, 17: Khyndiat sngi hadien ba u Chief Executive Member (CEM) jong ka Khasi Hills Autonomous District Council (KHADC) Bah Pynïaid Sing Syiem u la hiar ban khynra naphang ïa ki dukan bar jylla ha ka thaiñ Majai, ki 44 ngut ki nongkhaïi bar jylla kiba la leit tied ïa ka jingkhang jong ka Ingbishar Meghalaya High Court namar ka jingbym ïoh ïa ka No objection Certificate (NoC) ha ka sngi Thohdieng ki la leit ban pyndem hakhmat ka KHADC.
Kum ban shu pynkynmaw hangne, ka 5 tarik mynta u bnai u Bah Pynïaid Sing Syiem ryngkat bad u Executive Member Bah Joseph F. Lakadong ki la sha ka shnong Majai bad ha ka shnong Ichamati ban khynra naphang ïa ki dukan bar jylla ki bym biang ïa ki kot ki sla kiba leh ïa ki kam khaii pateng ha kine ki ar tylli ki shnong.
Kine ki nongkhaïi bar jylla kiba la wan ban pyndem ïalade ha khmat ka KHADC ki don kumba 12 ngut eiei kiba la kynthup lang ïa ki Exporter bad ki nongshong dukan.
Ha ka jingïakren bad u nongthoh khubor u Bah Pynïaid Sing Syiem u la ïathuh ba kine kidei ki 44 ngut ki nongkhaïi bar jylla kiba la leit ban tied ïa ka jingkhang jong ka Iingbishar Meghalaya High Court hadien ba ki shym la ïoh satia ïa ka NoC na ka Hima Sohra na ka bynta ban pynthymmai ïa ki Licence jong ki.
Napdeng kine ki 44 ngut, 20 ngut ki dei ki Exporter katba 24 ngut ki dei ki nongkhaïi kiba kham rit kiba aplai na ka bynta ban ïoh pynthymmai ïa ka License jong ki, hynrei namar ka jingbym biang ki kot ki sla kim shym la ïoh satia.
U Bah Pynïaid u la ong ba kane ka jingwan jong ki ka long ba ki wan ban pyndem ïalade hakhmat ka bor jong ka KHADC ryngkat ka jingkyrpad ïa u CEM ban pynïoh ïa ka Trading License bad ki la aiti ruh da ka shithi ban ïoh pynthymmai ïa ka License ka jong ki.
U la ïathuh ba ka KHADC, wat lada kine ki briew ki la wan ban kyrpad ruh ka hap ban peit katkum ka aiñ ym ban shu ai khumar ïa ka License.
Halor ka jingthaw ïa ka iew thymmai ha Khalipara da ki bar jylla ïa kiba la suba ba ki dei kiba donkti ban dkhat jubor ïa ka jingim jong u Bah Lurshai Hynñiewta ha ka shnong Ichamati, u Bah Pynïaid u la ong ba ki dang ap ïa ka jingujor bad tang shu ïoh pdiang ïa ka jingujor ka District Council kan ym ailad ïa ki bar jylla ba kin shu thaw ïa ki iew katba ha ka jaka kaba ki mon namarba Ichamati ka dei kaba dang hap hapoh u pud u sam jong ka District Council.
