Brup Jaw ummat u Bah Mayralborn Syiem haba kynmaw ïa ka jingurlong ka Northern Ri-Bhoi College ha Umden

Nongpoh, Rymphang 23: Haba kren haka jingïalang paidbah jong ka UDP mynta ka sngi ha Umden, u Bah Mayral Born Syiem kyrtong ka UDP na Nongpoh u la jaw ummat brup ban kynmaw ïaka jingurlong ka Northern Ri Bhoi College kaba dei kawei naki jingangnud jong u Dr. DD Lapang naduh ki snem bala leit noh, wat hapdeng shibun ki jingeh ki dieng pynkiang hynrei u Blei um shym la iehnoh bad katei ka College kala urlong ha katei ka thaiñ ban ai ka jingshakri ïaki samla pule bad la lah ruh ban plie paidbah ïaka haka 21 tarik Nailur 2021.
U la ong ruh ba katei ka College mynta kala sdang ban long kum ka shlem hikai bad ka jingkyrkhu ïaki samla pule ha katei ka thaiñ, bad um kwah ba katei ka college kan duh noh namar kumba long mynta naka liang jong u kum u nongmihkhmat ha ki snem bala leit noh u la kyrshan tyngeh wat ïaka tulop ki nonghikai, bad ki jinglut kiba bun ha katei ka College.
“Kane ka College kam dei ka jingmyntoi jong nga shimet, hynrei ka jingmyntoi ïaki khun samla pulem ki longiing ba duk bad ki kmie ki kpa ki bym lah ban phah skul sha ki jaka sor, namar na katei ka College ki samla ki lah ban pyndep ïaki degree jong ki” la ong u Bah Mayral bad kane ka dei ka nuksa ba ki kam pynroi kin dang urlong lada ki paidbah ki dang ibit ba un long u nongmihkhmat sha ka iing dorbar thawaiñ ka jylla.
U la ong ruh ba ka jinglong MLA jong u ka dei ka jingkyrkhu jong u Dr DD Lapang u ba la long kum u kpa, u nonghikai bad u paralok ba jan eh, u ba la pynheh pynsan bad ai um ai sboh, hynrei mynta u don ha kawei pat ka iing kam pher, watla kam long ha kaba paw, hynrei u Maheh Dr. DD Lapang un kyrkhu ïanga na lyndet.
Haka jinglong MLA u la pyrshang ban wanrah shibun ki kam pynroi, naduh ban kyntiew ïaka pule ka puthi, ka koit ka khiah, ki nongrep bad lada un jop biang un dang pyrshang ban buddien ïaki kam pynroi da kaba pynpaw ruh ba ka surok Nongpoh- Umden- Sonapur kala dei ban ioh ïaka mang pisa ha u snem 2022 hynrei ki dieng pynkiang kiba bun, la ioh lut kiwei ïaka mang pisa naka World Bank namar ki briew kiba bat ïaka bor haka PWD ki sih ïa u Bah Mayral Born Syiem, bad kane kala don ruh haka mang tyngka jong ka iing Dorbar, namar ki tieng ba lada katei ka surok kan urlong ioh iohnam u Bah Mayral.
Dei nakata ka daw ki dieng pynkiang ki don shibun ban khanglad bad kular ruh ha kane ka kynti ba mynta lada un jop biang, ki surok kin iong, ki hospital kin ieng, ka college kan bteng bad kum u khun ba hap sohpet ha Ri-Bhoi ngin ïakhun naka bynta ki jingeh bad ki ishu ba bun jong ka Nongpoh bad ka dong Ri-Bhoi baroh kawei.