Shillong, Rymphang 23 : Ka seng ki samla kaba na ka seng saiñpyrthei National Peoples party, ïa kaba la tip kyrteng kum ka National People Youth Front NPYF) Mawshynrut hapoh ka jingialam jong u samla Skhemborlin Hujon president ka NPYF Mawshynrut Block ha kajuh ka por kum u secretary incharge jong ka jylla uba dei u nongkhmih ïa ka West Khasi Hills District, ka la sangah tyngeh ïa ka seng HSPDP da ki jingkylli ban ong ruh kumno ka party sing ka nud ban ong ba ka Mawshynrut konstitwensi ka dei kaba la shah ieh shrah, hooid, kadei kaba la shah ieh shrah, hynrei mano pat ba la ieh shrah bad mano ba la long nongmihkhmat ha kine ki phew tylli ki snem kiba lah dep, kylli utei u samla ïa ka party HSPDP
Ha katei ka jingïakren u bah Skhemborlin u la pynshai ruh ba ka jingthungkam ha ki tnad sorkar bapher bapher u bah Gigur Myrthong MLA jong ka thaiñ um lah shuh ban thung hi bad kamdei shuh ka juk kaba kum mynshuwa, namar ha kum kane ka juk kaba mynta ki briew kiba lah nang lah stad kin lap lada ki wad jingtip, kumta ka seng ryngkat u MLA kam kwah ban budnam sniew kum ki MLA sialieh, hynrei lada u bah Gigur un jop biang ha kane ka kynti kaba mynta, ka seng kan thaw da kiwei pat ki lad na ka bynta ki samla yn ai ïa ka jinghikai khnang ba kin tip kumno ban wadkam wadjam ym tang ha Mawshynrut hynrei ba kin ïoh kam wat ha kiwei ruh ki bynta jong ka jylla bad shabar ka jylla ruh Ong u bah Skhemborlin.
