Man ka miet ki leit pynshoi ba ka NPP kadei ka party nongwei, ong u Bah Hamlet

Shillong, Rymphang 23 : U kyrtong ka NPP na Mylliem, Bah Hamlet Dohling ha ka sngi Palei u la ong ba mynta man ka miet ki don kiba leit pynshoi kylleng kylleng ba ka NPP kadei ka party nongwei bad ka party kaba nabar.
Haba kren ïa kane ha ka jingïalap elekshon kaba long ha Mylliem, u Bah Hamlet u la ong, “Tang lai snem nga la ïoh ban trei na ka bynta ki paidbah ka Mylliem constituency, hynrei nga sngewtynnat ba don ki rangbah kiba ong ba ka kam ba nga trei lai snem ka ïa ryngkat bad kito kiba la trei 15 snem.”
Da kaba pynpaw ïa ka jingkyrmen ba ki kam jong u kan kren ha kawei pa kawei ka longiing ha ka constituency , u Bah Hamlet u la ong, Pynban man ka miet ki don pat kiba leit ban pynsngewthuh bakla da kaba ong ba u Bah Ham mynta u ïaleh na ka seng NPP kaba dei ka seng nongwei.”
Shuh shuh u la ong ruh ba ha ki san snem ba u la long kum u MLA u la ai ka kaiphod jingkhein jingdiah aiu ba u la trei, bad ki paidbah ki la ïohi aiu u la leh ha ki san snem, bad bynrap ba lada kito kiba la long MLA 15 snem ruh ki dei ban ïathuh sha ki paidbah aiu ki la leh.
U la ong ba naduh u snem 2018 haduh 2013 ba synshar ka NPP kaba sngewtynnat ka long ba ha ki san snem ka Sorkar ba ïalam da ka NPP ka khlem shah khyrwait shabi na Delhi, bad kam donkam ïa kiba bat remote control na Gujarat ne Uttar Pradesh.
Shuh shuh u ong ruh ba dei tang na kane ka Sorkar ba ïalam da ka NPP ba ha Delhi ki tip ba ka Meghalaya ka kwah ïa ka ILP, ka kwah ban ithuh ïa ka ktien Khasi bad ka kwah ban pynbeit ïa u pud u sam, namar kane ka Sorkar ka la phah da ka jingthoh ryngkat ka muhor jong ki jingdawa.
Haba bynrap lang pat, ka nongai ktien jong ka NPP, Dr. Ampareen Lyngdoh ka la khyrwit tyngeh ïa ka seng Congress da kaba ong kaei pat ka nongrim jong katei ka party haba ka leit sha ki paidbah katba ïa ki para la jong ka nud ban beh shimiet shimiet.
Da kaba kyntu ïa ki paidbah ban kyrshan ïa u Bah Hamlet ba un jop biang mynta ka kynti na ka tiket NPP, ka Kong Ampareen ka la ong, “U Bah Hamlet u la dei lypa u trai NPP bad kumta ki paidbah kim dei shuh ban jied da uwei pat uba nabar uba lada u jop un sa leit ban trei lang bad ka sorkar NPP hi.”
Ka ong ruh ba lada ki paidbah ka Meghalaya ki jied shisha ïa ki nongïalam, ki nong Mylliem kin jied ïa u Bah Hamlet bad ka East Shillong pat ïa ka.
Ha kane ka jingïalang kaba la long ha madan ïingsyiem da ki spah ngut ki paidbah ki la poi ban sngap ïa ki nongrim jong u kyrtong bad kumjuh jong ka seng NPP.