Ban kyntiew ïa ka jingang jingstad, da ki tip sop ïing leit ai jingïarap ka RBYF sha ka Skul ha Umpowin

Nongpoh, Ïaiong 19: Kum shi bynta ban phai khmat na ka bynta ka jingbit jingbiang jong ki khynnah skul ba kin dang kiew shaphang ha ka liang ka pule ka puthi, ka Ri Bhoi Youth Federation (RBYF) mynta ka sngi ka la leit ban ai jingïarap ïa kawei ka skul ha ka Shnong Umpowin da ki tip sop ïing khnang ba ki bor pynïaid ka skul kin ioh ban tap ïa ka tnum ba la donkam ban pynbha na ka bynta ka jingbit jingbiang ki khynnah skul.
Kane ka skulk aba la leit ai jingïarap da ka RBYF ha ka jingïalam u Bah Neverson Makdoh lem bad kiwei ki nongïalam ka dei ka skul Mangkathiang Makdoh Secondary School, Umpowin, kaba dei kawei na ka skul kaba ai jingnang jingstad ïa bun ki heprit bad ki khun samla ha ki shnong ba hap ha ka thaiñ Umpowin-Mawlasnai ha Ri Bhoi.
Haba aiti ïa kitei ki tin sop ïing sha katei ka skul la don ryngkat ruh naduh u Bah Shining Shadap, General Secretary ka RBYF Raid Nongtung Circle, ki nonghikai bad ki khynnah skul jong katei ka skul pule.
Kum ban pynpaw, kane ka skul ka dei kaba la don haduh 500 tam ki khynnah skul kiba pule ban lum jingnang jingstad katkum ka juk stad ba mynta bad kum ki bor pynïaid skul da ka mynsiem jong ka jingkmen ki la pdiang sngewbha ïa kine ki jingai sngewbha ka seng na ka bynta ban dang bteng ka jingshakri ban ai jingnang jingstad ïa ki spah ngut ki heprit kiba pule ha katei ka skul.
Kum ka jingai mynsiem ïa kane ka skul ba kan dang ai ka jingshakri kaba bha tam ban kyntiew ïa ka pule ka puthi bad ka jingnang ka jingstad, u Bah Neverson Makdoh kum u nongïalam ka RBYF u la ai jingïaroh ïa ki bor pynïaid ka skul bad ha kajuh ka por ruh u la pynpaw ruh ba ka nongrim ka seng kam dei satia tang ban peit ïa ka eh ka shon jong ki paidbah ha ka Ri Bhoi bad ka ka pule ka puthi ruh ka dei kaba hakhmat eh ba ka seng ka angnud ban kyntiew hapoh ka them Ri Bhoi.
Namarkta, u la bynrap ruh da kaba ong ba kum ka seng lyngba ki nongïalap kin dang pyrshang ruh ban bteng ïa ki kam shakri katkum ka jingkotbor bad ha kajuh ka por ruh ka seng ka kyrpad ruh sha ka sorkar ba kan phai khmat kyrpang ruh sha kane ka skulk aba dang donkam shibun ki lad jingïarap na ka sorkar na ka bynta ban dang kyntiew ïa ka pule ka puthi jong ki heprit hapoh katei ka thaiñ, u la bynrap.