Ba pharia bad phiah ar bynta ïa ka iktiar jong ka hima ai dorkhas ka SSHL ha u CEM

Mawkyrwat, Ïaïong 19: Ka Seng Samla Hima Langrin (SSHL) ha ka 17 tarik u Ïaïong, 2023 ki la leit ban ai da ka dorkhas ha u Chief Executive Member (CEM) jong ka Khasi Hills Autonomous District Council (KHADC), Shillong ban pynsngew ha u halor ka jingpharia bad phiah ïa ka bor ka Iktiar jong ka hima ha kiar bynta ha kaba ïa ka kynhun la lam khmat da u bah P.S. Lyngdoh, u President ka Seng Samla Hima Langrin (SSHL).
Katkum ka Dorkhas ba kum ka Seng Samla Hima Langrin (SSHL) ka la dep ban phah ha u CEM ka KHADC la ong ba na ka liang ki khun samla kiba long ruh ki khun ki hajar hapoh ka Hima Langrin Syiemship, ki pynpaw ïa ka jingsngew-diaw, jingsngew-rem bad ruh ka jingduh jingkyrmen haba ki lap bad shem ba ïa ka Hima Langrin lah phiah bad pharia ïa ka bor ka iktiar ha ki ar bynta bad kane ka da ktah ïa ka burom ka ijot jong ka hima khamtam ïa ka bor jong ka lah dilute ne lah pyntlot noh.
Namarkata, kumba la tip ba ka KHADC lyngba ka Sixth Schedule ba lah pynkhamti ka riti synshar paidbah ha ka Ri India ban peit ban jngoh, ban ri ban sumar ïa ki jingdon jingem ki riti ki dustur jong ka Jaidbynriew, ki kwah ban buh to kane ka jingkylli bad kata ka long, “Naduh mynno had hato ka long be-aiñ ne em katkum ka riti dustur ha ka synshar khad-dar ki hima hapoh ka Ri Khasi ban ïa sam noh ïa ka bor ka Iktiar jong ka ne lah ban ong ban lilam noh ïa ka it ka hima sha ki ar bynta kata ka long ka hima bad ki ‘riew shimet jong ka hima?”.
Bad kumta kum ki khun ki hajar ki pynrem jur ïa kane ka jingsngap mynthi jong ka Khasi Hills Autonomous District Council halor kane ka kam ba kumno la ailad mynta bun bun snem khlem da leh ei ei ne pynshitom ïa kita kiba don kti ban lilam noh ïa kane ka bor ka iktiar jong ka hima ha ki ar bynta. Namarkata, ki samla ki kyntu ïa ka bor jong ka KHADC kum ki nongkhmih, ki nongpynïaid ba sngewbha ban leh ei ei halor kane khnang ba kan ym don shuh ka jingshah ktah ïa ka hok ki khun ki hajar hapoh ka hima lane la ka bor ka lktiar jong ka.
La ong ruh lyngba kane ka shithi kum ka SSHL ka ngeit skhem ba na ka liang jong u CEM ka bor ba hakhlieh ba khmih ïa ki it ki hima hapoh ka Ri Khasi ban shimkhia ban thaw da ka kynhun wad bniah halor kane la kane ka jingphiah ïa ka bor iktiar hapoh ka Hima Langrin ka ktah ne em ïa ka hok ki khun ki hajar hapoh ka hima, la ka ktah ne em la ka riti dustur, ka synshar khaddar, ka rukom bat khyndew bat shyiap, kaba la seng nongrim naduh u mynbarim ba la suit la shor ban pynskhem ïa kata ka hok longtrai khamtam eh la ki bor jong ki hima hapoh ka Ri Khasi.
Kum ki samla ba don kata ka jingsngewkhia ïa la ka Jaidbynriew ban shhngaiñ ki khun ki hajar ka hima ban lait na ka jingshah ïuhroit ki riti ki dustur ka synshar ka khadar. Kumta ka SSHL ka ailad mynta ïa ka bor jong ka Khasi Hills Autonomous District Council ban pynbeit bad lada ka bor jong ka Khasi Hills Autonomous District Council kam lah ban ïeng bad ïada la ka hok ki khun ki hajar ka hima kum ki khun samla jong ka Hima Langrin kim banse ban mih shakhmat da ka jingïakhih paidbah.
Katkum ka jingong u CEM pat u lah pan por ban pule bha bad wad bniah shwa halor kane ka kam namar u ong ba ym don jingtip ei ei halor kane ka jingleh jong ka hima bad ha kajuh ka por u kular ruh ba un sa phah ïa ki ophisar ban bishar bniah bad bud-dien bad ma u shimet na lade u ong ba kum kine ym dei ban jia hapoh ki hima khasi.