Sdang ka Athletic Meet ha Nongstoiñ, ïashim bynta 26 tylli ki skul ka WKH

0

Nongstoiñ, Ïaiong 19: Ka lympung 28th Chief Minister District Level Inter School Athletic Meet 2023, ba la pynïaid da ka District Sports Officer West Khasi Hills District, ka la sdang ha ka sngi balang ha madan NDSA Nongpyndeng, ha kaba ki 26 tylli ki skul bapher bapher jong ka District ki la ïashimbynta.
Ïa kane ka lympung mynta u snem la wan ban plie da ka District Medical Health Officer Nongstoiñ, I Dr S.A Lyngdoh, ha ryngkat ka jingdonlang jong I DSO Kong Balarina Syiem, ki nonghikai na ki skul, ki official bad ki samla pule na ki skul bapher bapher.
Haba kren ha ka jingïalang plie shwa ban sa kyntiew ïa ka lama bad pynbna ba la plie, na ka liang I kongsan I la ai jingkren ban kyntu sha baroh ki rang bad thei ïalehkai ba ki dei ban shimkhia bad ïalehkai da ka mynsiem jong ka jingïalehkai ba shisha.
I kongsan I la ban jur ba wat hapdeng ka jingpynleit jingmut halor ki lynnong kot, hynrei ka donkam ïa baroh hi kum ki khynnah skul ban pynmlien ruh ha ka kam kilan met, namar ka kam kilan met ka dei kaba kongsan tam ban ïoh ïa ka met kaba khiah krat.
Ha ka sngi sdang la pynlong ïa ka ‘march in’ bad ka jingbam smai na ki 26 tylli ki skul bad baroh ki nongïalehkai ki don kumba 1002 ngut kynthup ïa ki kynthei bad shynrang. Kane ka lympung kan kut ha ka 21 tarik ha kaba u Deputy Commissioner Bah Garod LSN Dykes (IAS) un long u kongsan.

Leave A Reply

Your email address will not be published.