Ban ïaid shaphrang ka jaka sumar ba 100 jingthiah ha Mawkyrwat, lum u MS ïa ki khlieh Nongsynshar Shnong

Mawkyrwat, Jymmang 10: Mynta ka sngi ka 10 tarik u Jymmang, 2023, u Medical Superintendent (MS) jong ka jaka sumar ba 100 Jingthiah kaba don ha South West Khasi Hills District, u Dr. W. Sutnga u la lum ïa ka jingïalang ïa ki khlieh nongsynshar Shnong jong ka South West Khasi Hills District ban ïa kren halor kumno ban nang pynïaid shaphrang ïa ki kam hapoh kane ka jaka sumar ha kaba ïa ka jingïalang la pynlong hapoh ka Conference Hall kaba don ha katei ka jaka sumar.
Lah ban kdew ba ka jingthmu ba hakhmat eh jong kane ka jingïalang ka long ban don ka jingïasngewthuh jingmut ne ïa phylliew jingmut ryngkat ki khlieh nongsynshar Shnong, ki Seng Longkmie da ka jingïadonlang ruh ki nongmihkhmat jong ka Mawkyrwat Constituency kata u bah Renikton Lyngdoh Tongkhar, MLA bad u bah Carnes Sohshang, MDC ha kaba kumno ban pynïaid bad kyntiew shaphrang ïa ka jaka sumar ba 100 jingthiah hapoh Mawkyrwat, South West Khasi Hills District.
Ha kane ka sngi la ïoh ruh ka jingbatai ba khambniah halor ka jingthmu jong ka jingïalang ryngkat ka jingpyni ïa ki dur bad ki jingthmu ban pyntyllun ïa ki kam nangne shakhmat bad ban tei ïa ka OPD Complex na u Dr. W. Sutnga, Medical Superintendent jong ka jaka sumar ba 100 jingthiah ha South West Khasi Hills District.
Ha kawei pat ka phang, u Dr. W. Sutnga u la ong ba u kwah ba kum ki nongmihkhmat kin pyrkhat sani kumno ban leh bad ban pynïoh ha ka por kaba biang ban shna ïa ka OPD Complex kumba la dep ban maitphang khnang ba ki paidbah jong ka dong ka thaiñ kin suk ha ka liang ka lad jingsumar na ka bynta kiba donkam ka jingïarap ha ka koit ka khiah.
U bah Renikton Lyngdoh Tongkhar, MLA ka Mawkyrwat Constituency haba kren ha ka jingïalang u la pynpaw ka jingaikhublei na ka bynta u Dr. W. Sutnga uba la lum lang ïa kane ka jingïalang namar ka long ka jingïalang kaba donkam ba kum ki khlieh nongsynshar shnong kin don ka jingïatreilang bad jingïasngewthuh jingmut ban pyntyllun ïa ki kam jong ka jingkoit jingkhiah hapoh jong ka distrik hi baroh kawei. U la ong ruh ba hadien ka jingplie ïa kane ka jaka sumar ha u bnai Nohprah, 2022 ki dang don shibun bah ki jingduna hynrei katba nang ïaid ki sngi ki por kane ka jaka sumar ka la nang kham bha bad u la ong ruh ba kam long kaba suk ban pynlong ïa ki jaka sumar kiba bit kiba biang lymda ym don ka jingïatreilang na baroh ki liang.
Ha kajuh ka por u bah Renikton, u la ai ruh ka jingïaroh u Dr. Sutnga namar u wan hangne ryngkat ki jingthmu kiba khraw kiba u don ha kaba kumno ban wanrah ïa kiba bun ki kam pynroi bad ki jingangnud hapoh kane ka jaka sumar ba 100 jingthiah. U la ong ruh ba hooid ki dang bun bah ki jingduna ba ka department ka dei ban leh bad lyngba ki jingpyni ïa ki dur na u Dr. Sutnga hynrei kyrmen ba lyngba ka jingïashimkhia lang baroh ki jingthmu kin sa urlong.
“Ban shna ïa ka OPD Complex kaba lah ban kot ïa ka mang tyngka haduh T. 2 lane T. 3 klur haba pyrkhat ka eh than hynrei kyrmen ba da ka bor jong ka Sorkar kan lah ban leh ïa kaba donkam na ka bynta ki jingdonkam jong ki paidbah ba bun balang”, pynpaw i bah Renikton. Haba kren pat ïa ki lad jingïarap na ka MLA Scheme, u bah Renikton u la ong ba haduh mynta ba ban ïarap ïa ki tnad sorkar kam pat ju don hynrei ka don beit tang na ka bynta ban pynïaid ïa ki jingdonkam ha ki shnong ki thaw. Namarkata, halor ka jingpynsngew jong u Dr. Sutnga na ka liang u bah Renik u la ong ba un sa pyrshang ban bud-dien da kaba pynlut ka por, ka bor ban pyrshang da ki lad ki lynti baroh na ka bynta katei ka jingangnud.
“Lada ki biang lut baroh khoit naduh ki jingtei kiba biang ne infrastructure bad kiwei de, ki nongtrei ruh kin sngew-juh sngew-jan, ki sngew-ïoh mynsiem ban trei”, ong u bah Renik. U la kular ruh ba nangne shakhmat halor ki mat ba la pyni lyngba ka presentation u la ong ba un sa pyrshang ban kren ha ki Myntri ba dei peit ïa ka tnad ka koit ka khiah, ki heh ophisar bad kiwei de khnang ba ka kam kan long kaba jop.
Katba ha ka jingkren jong u bah Carnes Sohshang, MDC ka Mawkyrwat Constituency u la pynpaw ba kane ka long ka sien ba nyngkong eh ba kum ki ophisar ka tnad ka koit ka khiah kan lum jingïalang ïa ki khlieh nongsynshar shnong kumba ban ïamir jingmut ban pyntyllun ïa ka kam jong ka jingkoit jingkhiah hapoh jong ka South West Khasi Hills District kham kyrpang hapoh kane ka jaka sumar ba 100 jingthiah kaba dang shu plie ha une u snem 2022. Namarkata, u la ai ka jingïaroh na ka bynta u Dr. W. Sutnga uba la leh ïa kane ka bynta lyngba ka jingïohi jngai jong u kumba ban don ka jingïamir jingmut shwa ban sdang ban pyntyllun ïa ki kam kiba khia kham ha khmat.
Ha ka jingkren jong u u la ong ruh ba lyngba ki jingpyni jong u Dr. Sutnga ïa ki jingthmu ba u u don ban leh hapoh kane ka jaka sumar ba 100 jingthiah, u bah Carness kum u MDC u ai ka jingkyrshan ba pura namar kane ka jingthmu ban pynbha shuh shuh ïa kane ka jaka sumar kam long ka jingmyntoi tang ïa uwei ne ar ngut hynrei ïa ki paidbah jong ka dong ka thaiñ baroh kawei kiba donkam ki lad jingïarap ha ka liang ka koit ka khiah. Kumta u la kular ba lada ka sorkar kan pyllait noh ïa ka pisa ba la mang kyrpang ha kaba ïa dei bad ki lad jingsumar ne ki Health Sector un sa lum lang ïa ki Doktor bad ki riew rangbah ban ïa pyrkhat kumno ban leh na ka bynta ki jingthmu ba bha hapoh kane ka jaka sumar ba 100 jingthiah.
U la pynpaw ruh ba um long uta u MDC u ban long u maw jynthut ïa ki department, ne maw jynthut ïa ki kam pynroi bad dei halor kane ka bynta ba u ieh ha ka jingstad jong ki ophisar bad ha ka jingïalam ba stad jong u MLA jong ka thaiñ ban peit ïa kiei ki jingdonkam. “Ngim don hangne kum ki MLA bad MDC ban ïa leh politik hynrei ngi don lang hangne ban ïa shim kawei ka rai kumno ban pynïar ïa ki lad jingtreikam hapoh kane ka jaka sumar”, pynpaw u bah Carness.
Kiba la ïadonlang ha kane ka sngi ki long naduh ki rangbah shnong jong ki shnong bapher bapher, u Dr. W.L. Narry, Senior Medical & Health Officer, ka Sister L. Kharbhih, Nursing Superintendent, ki Staff Nurse lem bad kiwei de.
Ïa ka jingïalang la pynïaid da u bah W.L. Snaitang, Secretary Shnong Mawkyrwat bad u Dr. A. Lyngdoh, Senior Medical & Health Officer u la ai ki kyntien pdiang sngewbha, ka jingkren lyngkot na kawei ka longkmie kaba wan thiah pang kaba la ong ba da ka jingdon jong kane ka jaka sumar ka la ai shibun ki jingmyntoi bad ki jingïarap bad kumta ka kyntu bad ai mynsiem ïa ki paidbah ba kin sumar bad leh khuid ïa ka kum la ka jong khnang ba kan long ka jingmyntoi ïa ka ban sa wan bad ka jingkren khublei na u bah L. Lyngdoh, Myntri Shnong Mawten.
Hadien ka jingïalang, u MLA ryngkat u MDC lem bad ki khlieh nongsynshar shnong hapoh ka jingïalam jong u Dr. W. Sutnga ki la leit ban jurip ïa ka Emergency kaba dang shu dep plie ha kine ki sngi kiba la leit.