Nongstoiñ, Jymmang 10: Ka jingpyrshah jong ki paitbah ka thaiñ Rambrai ïa ka jingksam marpoh khyndew ha Mawlangria ka la nang khih shuh shuh, nalor ba u bah Makdonal Lyngdoh bad u bah Shingstar Khardewsaw kiba pyntrei ïa katei ka jingksam marpoh khyndew kim shym la pynsngap satia ïa ka jingdawa ki paitbah.
Hynne ka sngi hatmajai jong kane ka taïew ba ki riew rangbah bad ki sordar jong ki hynñiew shnong ki la leit ban buh biang ïa ka dorkhast ha u Deputy Commissioner ka West Khasi Hills. Kumta u majistor ryngkat ka kynhun pulit, ki la hiar sha katei ka jaka bad ki rangbah jong ki hynñiew shnong, khlem da aili ki la ïa leit lang sha katei ka jaka bad haba la poi la lap ba ka jingksam marpoh khyndew ka dang ïaid bad la lap ruh ba ka don ka jaka pynlang um kaba la tih da ka thliew ban pynlang ïa ka um kaba ki pyndonkam ha kaba theh ha ka thliew ba ki ksam ban kham suk haba kynduh mawsiang.
U bah Makdonal Lyngdoh bad u bah Shiningstar Khardewsaw ruh ki la wan poi lang bad haba ki la poi ki la pyrshang ban pyni nia ïa ki paitbah, ha kaba u bah Shining lei lei u la ong ba ki paitbah kim dei ban wan tuklar namar ki la dep pynbiang ïa ki kot ki sla bad katei ka jaka ruh ka dei ka jong ki.
Katei ka jingong jong u ka la pynkhluit shuh shuh ïa ki paitbah ha kaba ki rangbah ki la pynphai nia kylla da kaba ong ba lada me ïoh jingbit, ka mut lada ki paitbah ki ïap lut kan biang beit ne kumno.
Haba la pyrshang ban kylli na uwei u bar jylla uba dei peit ïa katei ka kam, u la ïathuh ba ïa ka jingksam marpoh khyndew ha katei ka jaka la pyntrei da ka Shree Shree Minging Corporation Limited na Kolkata bad ki ar ngut ki rangbah, u bah Shingstar Khardewsaw bad u bah Makdonal Lyngdoh ki dei ki ba don kyrteng ha ka laisen na ka bynta ban pyntrei ïa katei ka kam.
Hadien katto katne por ki paitbah ki la ialum biang bad ki la khot ïa u majistor bad ki la pynsngew ha u ba ïa katei ka jingksam marpoh khyndew dei ban sangeh noh shisyndon, namar ha kane ka sngi ki dang ïa wan tang ki rangbah na ki hynñiew tylli ki shnong.
