Ban ïada ïa ki Riti dustur kam dei ka jingïa-nia hynrei ka dei ka Nongrim bad ka mat ka jura jong ka RDA: Robert

Mawkyrwat, Lber 20: Ka Regional Democratic Alliance (RDA) kaba kdup ïa ki ar tylli ki party ka United Democratic Party (UDP) bad ka Hills State People’s Democratic Party (HSPDP) ha ka 19 tarik u bnai Lber, 2024 ka la pynlong ka jingïalang paidbah ha Ranikor, South West Khasi Hills District ban pynshai ïa ki mat ki jura shwa ban poi ka sngi jong ka jingjied ïa ki nongmihkhmat sha ka Lok Sabha ne MP Election jong u snem 2024.
Ha kane ka sngi la ïa donlang naduh u bah Robertjune Kharjahrin kum u kyrtong ïa monlang jong ka Regional Democratic Alliance (RDA), u bah Pius Marweiñ, MLA/MDC ka Ranikor Constituency bad kum u Chairman ka Regional Democratic Alliance (RDA), South West Khasi Hills District, u bah Metbah Lyngdoh uba dei u President Rangbah jong ka UDP, u bah K.P. Pangniang, President ba Rangbah jong ka HSPSD bad General Secretary jong ka RDA Central Body.
U bah Roberjune Kharjahrin haba kren ha ka jingïalang paidbah, u la ong ba ka Jaidbynriew ka bym burom ïa la ka Riti Dustur ka long kum u Dieng khlem ki thied, namar u Dieng khlem ki thied u long uba ïap bad ka Jaidbynriew khlem ki Riti dustur ruh ka long kaba ïap. U la ong ruh ba ka jingïada ïa ki Riti dustur kam dei ka jingïania tang ha kane ka kynti hynrei ka dei ka Nongrim bad ka mat ka jura ba hakhmat eh jong ka Regional Democratic Alliance (RDA).
Namarkata, u la pynshai ha ki paidbah ba ka long kaba donkam ba ban ïada ïa ka Riti Dustur da kaba pynkhlaiñ ïa ki District Council ym ban pynduh noh namar lada ki District Council ki khlaiñ ha ka bor ban thawaiñ ki riti Dustur jong ngi ruh kin ïai neh bad ki kam bei-riti kum ka jingai jaidkpa kin nym ïoh jaka.
U la ong ruh ba ban ïada ïa ka Riti-Dustur ha ka jingïohi jong u, ka long ban pynkhlaiñ ïa ka Khyrnit Hynriew ymdei ban pynduh ne rat dyngkhong noh ïa ka namar ka jingpynkhlaiñ ïa ka Khyrnit Hynriew khamtam eh ban pynïoh ïa ka bor thaw aiñ kaba thikna da kaba pynïoh ïa kata ka mynsiem jong ka Article 200 hapoh ka Khyrnit Hynriew ka dei ka jingraikut jong ka RDA khnang ba ki kam bei-riti kum ka ai jait Kpa jong u Khasi kin nym ïoh lad ha kane ka Ri.
“Ka UDP bad ka HSPDP kiba la pyni ïa ka dur ka dar jong ka jinglong Rilum mynta la bun tylli ki snem, ka UDP ka la 26 snem bad ka HSPDP la palat 50 tylli ki snem bad sa ka VPP ka dei ne kam dei ngin sa ïapeit ka long kumno”, u la pynshai ba ka dei ka jingshisha ba napdeng ki seng ‘riewlum.
Haba pynshai shuh shuh halor ki mar ki jura jong ka RDA, u bah Robertjune u la pynsngew ba lada ki paidbah ki mon ban jied u kum u nongmihkhmat sha ka Lok Shabha, u kular ban rah hapoh ka Dorbar Parliament ïa ki jingeh bad ki jingangnud ki paidbah, kiba kynthup ïa ka jingpyrshah CAA kaba dei kawei na ki aiñ Sorkar India kaba long ka jingma ïa ka jaitbynriew rit paid, ki aiñ kiba tehlakam ïa ka jingtih ïa ki marpoh khyndew, ki lad kamai lyngba ka khaïi-pateng bad ka Ri Bangladesh bad kiwei kiwei.
Kiwei de kiba la ïadonlang ki long u Ma Lehkmen Rymbui, Nongaibuit ka Sorkar Meghalaya, MLA ka Amlarem Constituency, u bah Titos Chyne, CEM barim jong ka KHADC, Working President ka UDP Central Body, u bah Olansing Suin, MLA ka Mawsynram Constituency, u bah Renikton Lyngdoh Tongkhar, MLA ka Mawkyrwat Constituency bad kiwei de.
Ïa ka jingïalang la pynïaid da u bah C. Nongbri ka jingkren khublei na u bah G.G. Bung Snaitang, President ka UDP South West Khasi Hills District.