Ngan bsuh lyngba la jingkhangïit kaba rit ban leit sha Parliament ban kren na ka bynta ki khasi,ki Jaiñtia : Dr M.Ampareen Lyngdoh

Khliehriat Lber 20: Ha ka jingïalang paidbah jong ka party National People’s Party ba la pynlong mynta ka sngi ha Communty Hall Khliehriat West, u Symbud myntri rangbah ka jylla, u bah Sñiawbhalang Dhar bad u MLA jong ka Jowai, u bah Wailadmiki Shylla, ki la ther ïa ka party Voice of the People Party (VPP) bad kyntu ruh ïa ki paidbah ba kim dei ban shah ïalam bakla bad kim dei ban shah pynbiej “ong kiba stad ba ka VPP kam bam sap hynrei ka don ka sap ban bam, wat shah pynbiej wat shah ïalam bakla”, u kynthoh ruh ba u Prah u pynlong jingïalang bad heh ktien tang ha ki jaka ïew namar lada khot ha madan ym don briew ba wan
U Ma Sñiawbhalang Dhar, u la ong ruh ba “ki kren tang ïa ka bam sap, lada ngi bam sap ujor da ka ejahar lada phi lap ba ngi bam sap ma ngi” u la kynthoh ruh ïa ka jingpynkhih ïa ka Reservation Policy bad ong ba kane ka la long pynban kumba pynkhih ïa ka ksing ngap, kumjuh ruh ka jingpyrshah ïa ka ktien hindi bad ong ba ha Parliament lei baroh san snem ki kren beit da ka ktien hindi.
U la kyntu ïa ki paidbah ban jied ïa ka Dr Mazel Ampareen ban leit mihkhmat sha Delhi namar ki don bun ki kam pynroi ki ban wan na ka sorkar pdeng na Delhi bad ong ruh ba dei tang ka party NPP kaba ïaid shakhmat bha mynta khamtam ha ki kam pynroi.
Ka Dr Ampareen Lyngdoh ka kyrtong MP na ka party NPP, haba kren ha ka jingïalang ka la ong ba kan leit ban bsuh sha ka ïing dorbar Parliamant lyngba ka jingkhang ïit kaba rit namar ban rung na ki jingkhang heh kam i long shuh, namar na ka jingkhang ba heh ha Parliament ki la don ki ar ngut ki radbah kata ka BJP bad ka Congress ki bym ju ïahap jingmut “kumta ngan rung lyngba ka jingkhangïit ha ka ophis u myntri rangbah duh jong ka ri bad ki myntri baroh ban ong ïa ki, ba ngi dei ki khun khasi Jaiñtia, ban wad lynti ban pynkhraw lem ïa ka jaidbnriew”
“Ngam kwah ban don ha ka party kaba ïakren tang ïa ka kyrteng u President, nga ai khublei ïa ka NPP ba ka khlem pynjah kyrteng ïa nga, kumjuh ruh ki paidbah, phi khlem kynmaw tang ïa u President, ngam don ksiar rupa ban ai bad ym donkam ïa kata, nga kular tang ka jingtrei shitom ka ba ngan ai ha baroh ki por bad ai ba ka por kan batai, kumba phi kren beiñ ïa nga, phi tim da ka sih ka sang ha ki social media ka mymsiem jong nga ka kthang hynrei ka jingmut jong nga ka nang skhem ba ngan ïeng bad kiew bad ngan trei shitom namar khlem ka jingtrei shitom kam poi shano shano ruh” ka la bynrap.
Ka la kyntu ruh ïa ki paidbah ba ki dei ban da ïa pyrkhat sani bha ïa kane ka kam bad ka ngeit ruh ba kane ka jingithuh ka party NPP ban pynkhamti ha ka kum ka longkmie ban shim ïa kane ka kam kaba khia ka dei ka ka jingsdang kaba thymmai, ka la ong ruh ba 33 percent ki longkmie kin ïoh ban ïuhkjat ha Assemby bad ha Parliament naduh u snem 2028, ka kyntu ïa ki longmie ban pynkhreh bad pynkhlaiñ ïalade, kumjuh ruh ki long kpa, ki khun samla ban ïarap lem ïa ki longkmie ki ban don bynta lang ha ka saiñ pyrthei kum ki lai tylli ki maw byrsiew, u kpa kum u khlieh ka ïing.
Ha kajuh ka por, ka la khot bad wer lang ruh ïa ka party UDP ban wan ban ïakyrshan lem lada ka sngew ba ka i donkam ban ïatreilang, namar ka UDP ruh ka dei ka ba don lang ha ka sokar synrop, namar ha kane ka jingïaleh MP la dei shisha ba ïa treilang ym dei shuh ban ïa peit party “ngam ju leh shiliang ïa ka UDP nga la iarap ïa ka Khliehriat CHC, ka pisa kaba T16 klur nga la pynïoh ïa ka CHC Khliehriat kaba dei ka constituency ba jop ka UDP, ngam shun ïa ka UDP to ngin ïa trei lang, ngan leh katba nga lah nga tyrwa ïa kane ka jingïatreilang kane ka dei ka bynta ban ïatreilang” ka la bynrap.
“Nga la ïarap ia ka Khliehriat CHC ka constituency ba jop ka UDP to ngin ïa trei lang, ngan leh katba nga lah nga tyrwa ïa kane ka jingïatreilang kane ka dei ka bynta ban ïatreilang namar lada ngi pharia ïa ka vote jong khasi bad Jaiñtia lada ngi saphred ngin khyllem , phi la ïohi ïa ka jingkloi jong nga ban ïarap ha kano kano ka bynta ba nga trei” la bynrap.
Ka Dr Ampareen ka la pynpaw ruh ïa ka jingbym sngewtynnad ïa ki policy pyntreikam jong ka sorkar BJP kaba pyrshang ban bret ïa ngi ki rit paid bad bynrap ba ka la wan ban rung sha kane ka party NPP ha ka por kaba biang “Tang namar ba ki ïadur ki ar ngut ki rad bah ha ka Parliament ma ngi ki rit paid ngim dei ban shu jah noh, ki dei ban kynmaw ïa ngi bad nga sngewkmen ba kane ka party ka la ibit ïa nga ba ngan shim ïa kata ka bynta ban rung lyngba kane ka jingkhangïit ban rung ha ka ophis u myntri rangbah duh ka ri bad ki myntri baroh ban ong ïa ki ba ngi dei ki khun khasi Jaiñtia ”
“Lada ka ktien beiñ ha kano kano ka rynsan lane ha social media ne ha ki pathai khubor, lada ka lah ban pyniap ïa nga nga la dei ban mih phlang naduh mynno, hynrei nga ïeng skhem ban ong ba ngan nym reij ïa ki jingshah kren beiñ hynrei nga ïeng skhem bad ngan trei shitom, haba la ai ïa nga ka lad ka lynti ba ngan mihkhmat na ki 36 tylli ki constituency kiba long kum shi para”
U MLA jong ka Jowai Constituency, u bah Wailadmiki Shylla, u la ther ïa ka VPP bad ong ruh ym don kawei ka mat ïakhih jong ki ka ban poi thong kum ka jingïakhih Reservation policy, ka Lokayukta, ka Clean Politic ym don kawei ruh ban pyndep hynrei la shu ïaid nawei sha wei, u la kyntu ïa ki paidbah ba ka donkam ban da shai bha ym dei ban shu shah pynbiej “kiba kam ba ki dei party ba thymmai tangba haba peit ki nongïalam ki dei kijuh hi” u la bynrap.
Utei u MLA na Jowai, u la kyntu ïa ki paidbah ban kyrshan ïa ka Dr Ampareen Lyngdoh ha kane ka election MP sha ka Loksabha ka ban kren ïa ki kam pynroi ha ka dorbar Parlaiment ha Delhi, namar kiba bun ki kam pynroi ki wan na ka sorkar pdeng na Delhi, kum ka skim sam um, ka JJM, ka skim shna ïing bad kiwei kiwei ki skim pynroi. Kumjuh ruh ban shna ïa ki surok bah national highway ka dei ka sorkar pdeng kaba peit ïa kine.
Ka MLA jong ka Sutnga Saipung constituency, ka kong Santa Mary Shylla, ka kyntu ïa ki paidbah ba kin ai ka jingkyrshan ïa ka kong Ampareen Lyngdoh namar kumba ma ka ruh ka pynrem ïa u bah Vincent Pala uba dei u MP ka ngeit ruh ba ka kong Ampareen kan pynrem ïa u bah Vincent Pala uba na ka party Congress ha kane ka kynti ruh bad ong ruh ba ka kong Ampareen kan kren ruh ïa ki jingeh jong ki long kmie namar ba ka dei ka longkmie kaba pher bha, kaba shim khia bha ïa ki kam, kaba kloi ban shim khia haba don kano kano ka jingeh.
Ha kane ka jingïalang ha Khliehriat la ïa don ryngkat lang ruh u bah Nehlang Lyngdoh, u MLA ba rim ka Khliehriat, u bah Justine Dkhar, ki MDC, ki riew rangbah, ki longkmie, long kpa, ki khun samla kynthei bad shynrang kiba na ka thaiñ East Jaiñtia Hills District.
Haba kren ha ka jingialap elekshon ha Jalaphet, East Jaintia Hills ryngkat bad u Symbud Myntri Rangbah ka jylla u Sniawbhalang Dhar, ka kong Ampareen kala ong “Ngan trei ryngkat bad ki Dolloi bad ki Waheh Chnong ban sngewthuh ïa ka jingeh ka jongki bad ban rah hapoh ka Parliament”.
Ka Kong Ampareen kala leit ruh ban ïakynduh ia ki nongïalam jongka NPP Sutnga Saipung Block.
“Nga pynpaw ka jngsngewnguh ïa ka seng kaba la jied iïa ka longkmie bad ïa ki paidbah kiba la jied ïa MLA kynthei na Saipung Constituency ban pynpaw ïa ka sur jongu paidbah hapoh ka ïing dorbar thawaiñ ka jylla” kala ong bad ka bynrap ba ka NPP kala ai bynta bha ïa ki kynthei ban long ki nongïalam na ka bynta ban shimkhia ïa ki jingeh kiba mad da ki paidbah ka jylla.
“Ka la dei ka por ïa ki paidbah jongka Sutnga Saipung ban jied sa ïaka longkmie ba kan long ka MP ka jongki”.
U Bah Sniawbhalang Dhar ula pynshai ba ka jingjied ka NPP ban pynïeng da ka kynthei ha ka elekshon MP kadei namar ba ka dei ka kmie kaba don jingkitkhlieh ym tang ïala ka ïing hynrei ia ka constituency ruh baroh kawei.
Ula kynthoh ruh ïa ka seng VPP kaba pyrshang ban kynnoh ba ka sorkar MDA kadei kaba bamsap bad ula ong, “Lada ki jngkynnoh ki long kiba shisha, balei pat ki paidbah ki dang shaniah bad ai jingkyrshan biang ïa ka NPP ban synshar biang”.
Ula ong ba ka Dr. Ampareen ka dei ka kyrtong kaba biang tam ban mihkhmat ïa ka Shillong ha ka Lok Sabha bad ula pynpaw ba kan mihkhmat na ka bynta ka jingangnud jong ki lak ngut ki paidbah jong ka constituency.