Syrtok ka leit ka wan ki paidbah sha ka thaiñ Mawsynram ba duh ka trok kit shini hapdeng surok

Shillong, Lber 20 : Ha ka step jong sngi Balang ka 20 tarik Lber 2024 ki kali kiba mut ban kiew sha Shillong bad ba hiar sha ka thaiñ Mawsynram, Ranikor, ki la sahkut lut ha Pomlum haneng Mawsynram hadien ba kawei ka trok kaba kit shini kaba hiar sha ka thaiñ Mawsynram ka la duh hapdeng surok na ka jingkheiñ u beam pyndait tyre.
Na ka jingduh katei ka trok, ka la pynlong ïa kiba bun ki kali khamtam ki kali heh, naduh ki trok, bus bad ki sumo kim lait shuh ban ïaid ha kaba ki don kiba hap phai noh lait noh tang ki kali rit ki lah ban ïaid.
Bad ha katei hi kajuh ka jaka, kawei pat ka kali bolero pickup kaba hiar sha ka thaiñ Mawsynram ka la sahkut ha ka nala kaba dei na ka jingthmu ban ïaid bad kiar ïa katei ka trok kaba la duh noh kham hashuwa. Kumta da ka jingsahkut katei ka bolero pickup ka la nang wanrah shuh shuh ka jingsahkut ki kali bad hadien la wan ban tan noh da ka kali khwai.
Hadien ba la tan da ka kali khwai ïa katei ka pickup, ki nongñiah kali ryngkat ka jingdonlang ki pulit, ki la thep bad pyndap da ki maw ïa ka nala tang ban ïoh ïaid ki kali rit.