Na East Jaiñtia bad South Garo Hills yn sdang ban tep nyngkong ïa ki ‘liew tih dewïong

Shillong, Lber 20 : Ka tnad Mining and Geology jongka sorkar jylla ka la jied ïa ka Sutnga ha East Jaintia Hills bad ïa ka Agremggitim ha South Garo Hills ban sdang nyngkong eh ban btep noh ïa ki ‘liew tih dewiong ka ban long ruh kum Pilot Project na ka bynta kane ka kam.
Na ka liang ka Committee ba la khlieh da u Justice BP Katakey ka la ai por ïa ka sorkar ban buh da ka por ban pyndep ïa kane ka projek ban btep ïa ki ‘liew tih dewiong kata ha East Jaintia, West Khasi Hills, South West Khasi Hills, West Khasi Hills bad South Garo Hills.
Ha ka kaiphod ba 21 ba ka la ai sha ka ïing bishar High Court jongka jylla ka Committee ka la pynpaw ba ka sorkar jylla ka la ïatrei lang bad ka Central Mine Planning and Design Institute Limited (CMPDI), ka tnad jongka Coal India Limited ban ïarap ryngkat ki kor ki bor ban pynbha pat ïa kine ki jaka ba la dep tih dewiong.
Ka jingpynkhreh ban bthep noh ïa kitei ki ‘liew tih dewiong ha Sutnga bad Agremggitim ruh ka la ïaid shakhmat.
Ka CMPDI ka la ai ruh ïa ka kaiphod ba ka la pynkhreh ban pyntrei na ka bynta kitei ki ar tylli ki pilot projek ha Sutnga bd Agremggitim bad mynta ka dang pynkhreh ruh ïaka Detail Project Report (DPR) na ka bynta baroh saw tylli ki disrict bad hadien ba la dep yn sa phah sha ka Oversight Committee ban mang pisa na ka MEPRF.
Ka Committee haba bishar ka la lap ruh ba ka jingpynkhreh ïa ka jingtrei ka long kaba suki bha bad kumta ka la rai ban buh da ka por ban pyndep ïa katei ka jingbtep ïa kitei ki ‘liew tih dewiong kiba wanrah ka jingma bad jingmynsaw ym tang ïa ki mrad, ki jingri hynrei wat ïa ki briew ruh kumjuh kiba sah hajan kitei ki ‘liew tih dewiong ha baroh saw tylli ki Distrct.
Nalor kane ka Committee ka la ai jingmut ruh ba pynsted ban pynbha ïa ki sawdong sawkun ka mariang kaba la shah pynjot pynjulor na kane ka jingtih dewiong bad mawshun namar ka pisaka la don lypa bad ka MEPRF.