Jowai, Lber 20: Ka Kiang Nangbah Government College, Jowai, hynnin ka sngi 19 tarik kala pynlong ïa ka jingïakop kyntip ne ka (Quiz competition) na ka bynta ki members jong ka College’s BIS Standards Clubs.
La pynlong ïa kane ka prokram shi bynta ban rakhe ïa ka sngi ‘World Consumer Rights Day’, ïa kaba la mut ban pynlong haka 15 tarik u Lber 2024 hynrei la pynkynriah tarik na ki daw bym lah ban kiar.
Ka jingthmu jong ka kane ka jingrakhe ka long shi bynta ban ai jingtip shaphang ka hok jong ki nongthied nongpet hapoh ka ri jong ka pyrthei hi baroh kawei lyngba ki samla pule.
Ka Standards Clubs kaba dei kawei na ki rishot bah ban ai jinghikai shaphang ka hok ki nongthied ym tang hapoh ka ri bad kumjuh ïa kiba don shabar ka Ri kumjuh.
Ïa ka jingïalang la pynïaid da ka Jessica Dkhar, ka nonghikai jong ka College, na ka liang ki member jong ka Standards Club hashwa ban sdang jong ka session ba nyngkong kila shim bynta ban ïarwai haka ktien Hindi ïa ka Bureau of Indian Standards (BIS) Manak Geet.
Na ka liang u Dr. Blessing Roy Suchiang, Mentor, Standards Clubs, Kiang Nangbah Government College, ula ai ki kyntien pdiang sngewbha ïa baroh kiba la poi sha kane ka prokram da kaba ai ka jingïaroh ïa ki samla pule kiba la ïashim bynta lang ha kane ka sngi.
Ula ong kane ka jingïakop kyntip (Quiz Competition) ym tang ba ka long kum ka jingrakhe ïa kane ka sngi hynrei kan ïarap shibun eh halor ka jingdonkam ban tip ïa ka hok jong ki nongthied nongpet haki ïew ki hat.
Na ka liang ki samla pule ka College kila ïashim bynta da kaba ai ïa ka jingshad tynrai ban pyni ïa ka jingriewspah ka riti dustur jong ki jait bynriew Pnar.
Ka Dr. Easter Meena Blah, Principal jong ka College, haka jingkren kala ong ka jingrakhe ïa kane ka sngi ka long kaba donkam eh, da kaba ong kum ki nongthied ki dei ban tip ïa ka hok la jong kaba khlem shah ñiewbeiñ ha ki nongdie bad kan long kaba khuid ba suba hapdeng ki nongthied bad nongdie.
U Shubham Sanu, uba mihkhmar na ka BIS ula baitai shaphang ka BIS, halor ka rukom treikam jong bad kiwei de ki lad treikam, ula ai jingtip shaphang u BIS Care App bad BIS Quality Connect App kyrpang sha ki samla pule, ha kane ka session ba nyngkong la ïoh ïa ki kyntien ai khublei na u Rimiki Lada Nonghuloo.
Katba ha ka session ba ar la sdang ïa ka jingïakop Quiz Competition bad ki nongjop ki long kumne la wan ba nyngkong da u Hamesainkupar Shadap bad u Wanshandame Dkhar, ïa ka nam ba ar la ïoh da Because Syrti bad Ngihunlang Shadap, ka nam ba lai la ïoh da Ebakordor Iakai bad Fascilitia Myrchiang, ïa ka Consolation prize la ïoh da Laxmi Kumari bad Sujatha Nath.
