Nongpoh, Lber 20: Watla u President ba rangbah ka UDP ha Ri-Bhoi District, u Bah Donbok Khymdeit u ba la resaiñ noh naka party um shym la kren ne pynpaw eiei sha kano ka party ban pynïasoh hadien ba ma u lem bad ki nongïalam ka UDP ha Ri-Bhoi kila resaiñ noh mynta ka sngi kum ki nongkitkam ka party, hynrei ka lyer ka beh ba kitei ki nongïalam bala resaiñ naka party UDP kin sa leit ban pynïasoh bad ka NPP kaba dei ka party ba synshar haka jylla.
Kane ka jingmih noh jong ki nongïalam ba hakhmat ka party UDP ha Ri-Bhoi lehse kan ktah shibun bad wanrah ka jingkylla ha kane ka elekshon MP khamtam ïa u kyrtong MP bala pynïeng da ka kynhun synrop jong ki seng riewlum ka Regional Democratic Alliance.
Kum ban shu pynpaw hangne ba ka kong Rona Khymdeit kaba dei ka MDC barim ka Nongpoh kaba lamih naka seng UDP kaba la leit ruh ban pynïasoh bad ka seng Congress shuwa ka elekshon MLA kaba dep, mynta ka kynti kala rai ban pynïasoh noh bad ka party NPP ban sa pdiang burom haka 22 tarik mynta u bnai ha Nongpoh.
Kumba u nonglum khubor u la bna ruh ba kin dang bun kiwei pat ki nongïalam ki ban sa pynïasoh bad ka NPP ha kine ki sngi ban wan, kane kan dang pynkhlaiñ shuh shuh ïaka party NPP na Ri-Bhoi District shuwa ka elekshon MP ka ban sa long ha u bnai ïaiong mynta u snem, watla kiwei kiwei ki kyrtong na kiwei ki party ruh ki dang ïaleh shaid shaid ban pan ka jingkyrshan naki paidbah.
