Ba pas bha ha ki eksamin pynkup burom ka Kur Snaitang ïa ka Steffi Niza W. Snaitang bad ka Chelsy Snaitang

0

Mawkyrwat, Jymmang, 24: Ka Kur Snaitang kum shibynta bynta ban ai mynsiem ïa ka jinglah jong ki dkhot jong ka Kur ha kaba ïa dei bad ka pule puthi, kum ka kur kam lah khlem da pynlong ka jingïalang ban pynkup burom ïa ki ha Kench’s Trace, Shillong, East Khasi Hills District.
Ka jingpynkup burom jong ka Kur Snaitang ka dei ïa ki ar ngut ki khun jong ka Vinetta Snaitang bad u bah W.L. Warjri kata ïa ka samla Steffi Niza W. Snaitang bad ka samla Chelsy Snaitang kaba dei napoh ka shnong Mawkyrwat, South West Khasi Hills District. Ka samla Steffi Niza W. Snaitang kaba la poi ha ka 2nd Position jong ka top 20 ha ka Final Exam 2022 jong ka HSSLC na ka Science Stream bad ïoh jingkheiñ haduh 477 na St. Edmunds Collage, Shillong. Kumjuh ruh ka para jong ka samla Chelsy Rimesha W. Snaitang ka la wanrah ïa ka jingjop ha ka SSLC 2022 jong ka ICSE Board da kaba ïoh 94.5% na Pinemount Higher Secondary School, Shillong bad kine ki dei shi para.
Haba kren ha ka jingïalang ba lyngkot, na ka liang ka samla Steffi Niza W. Snaitang ka la ïoh ruh ban pynpaw ïa ki katto katne ki kyntien halor ka jingjop jong ka ha kane ka jingïakhun ïa ka eksam da kaba ong ba jingjop jong ka ka dei lyngba ka jingtrei shitom bad jingkut jingmut ba skhem wat hapdeng bun ki jingeh. Namarkata, lyngba kane ka jingjop ka la ai burom ruh ha ki kmie ki kpa ba dei lyngba ki jingaimynsiem bad jingkyrshan jong ki ba kum ka samla pule ka poi sha ka thong jong ka jingjop bad ruh ym tang kata ka la ai ruh ka burom sha U Blei ba U la ri la sumar ha ka jingïaid lynti jong ka ha ki por baroh.
Ka samla Steffi Niza W. Snaitang ha ka jingkren jong ka la pynkut da ka jingrwai, “Oh! My Soul Bless the Lord”.
Ka kong Balarihun Snaitang, Programme Co-ordinator-cum-Counsellor jong ka Jingïaseng Kynthei Mawphlang Presbytery ka la ai ki kyntien jong ka jingpynshlur bad kyrkhu kyrdoh ïa ka samla Steffi Niya W. Snaitang bad kumjuh ruh ïa ka samla Chelsy Snaitang ba kin nangkiew shaphrang ha ki jingpule.
Kiwei pat ki nongkren ki long u bah Testing Snaitang, President jong Kur Snaitang Raibah Zone, u bah Arbor Snaitang, President jong Kur Snaitang Shillong Zone, bah Handing Snaitang, President jong Kur Snaitang Mawkyrwat Zone bad u bah W.L. Snaitang, General Secretary jong ka jong Kur Snaitang.

Leave A Reply

Your email address will not be published.