Mawkyrwat, Jymmang, 24: Ka Sur u Paidbah jong ka South West Khasi Hills District ki la pynshai paidbah ha ki lad pathai khubor ba kan don ka jingïa-ïaid paidbah ne ka rally ha Mawkyrwat ha kaba kane ka rally ka dei halor ka bynta ban pynthymmai ïa ka rukom thung-kam thung-jam ne ka Reservation Policy ha ka jylla Meghalaya.
Ïa kane ka kynhun jong ka Sur u Paidbah jong ka South West Khasi Hills District la lamkhmat da u bah Blessingstar Mawlieh, u bah Pynkhraw Kharjahrin bad kiwei de ki ‘riew rangbah bad ki samla na ka thaiñ Mawkyrwat ha kaba ki la khot sha ka jingïa-ïaid paidbah ka ban sa long ha ka 25 tarik u Jymmang, 2023 ha ka por 11 baje myntep ha Mawkyrwat.
Lah ban kdew ba kane ka jingïa-ïaid paidbah ka long kum shibynta ban ai mynsiem ïa u bah Ardent Miller Basaiawmoit ba ula pynlong ka jingshah thngan na ka bynta ban pynthymmai ïa ka rukom thung-kam thung-jam (Reservation Policy) hapoh jong ka jylla Meghalaya.
Namarkata, ka Sur u Paidbah jong ka South West Khasi Hills District ka khot bad ka wer ïa ki paidbah, ki samla jong ka distrik baroh kawei kiba don ka jinkitkhlieh ïa ka lawei ka pateng ka ban dang wan kin sngewbha ban wan ïa shim bynta lang khnang ba ki jingthmu baroh kin long kiba seisoh namar lada ymdon ka jingïatreilang na baroh ki liang ki jingthmu kin nym poi haei haei ruh.
