Ka jingïoh jingkyrshan jong ka Voice of the People Party (VPP) na ki paidbah nongshong shnong jong ka rilum Khasi bad Jaiñtia ka la nang sawa katba nang mih ki sngi ha kaba ïadei bad ka jingdawa jong ka ban peit biang ïa ka Reservation Policy.
Ka VPP kum ka seng saiñpyrthei kaba ïeng ban dawa ïa ka jingpynbeit thymmai ïa ka Reservation Policy 1972, kaba la kynjoh la san phew wei tylli ki snem. Ki nongïalam jong ka Voice of the People Party (VPP) bad ka Khun Hynñiewtrep National Awakening Movement (KHNAM) ki la mih jyndat na ka jingïalang jong ki seng saiñpyrthei ba la khot pynlong dang shen da ka Sorkar Jylla naba ki pynpaw ba kim hun ban shu ïakren tang ïa ka Roster System khlem da ïaktaid ruh ïa ka Reservation Policy, 1972 namarba katkum ka jingsngew jong kine ki ar tylli ki seng seng saiñpyrhtei ba la donkam ban pynthymmai noh ïa ka Reservation Policy. Ka jingdawa jong kine ki ar tylli ki seng saiñpyrthei lada thew tarajur ka long kaba shongnia namarba ka Roster System ka treikam shadien ym shakhmat.
Watla ka Ingbishar Meghalaya High Court ka la aiti beit ban pynbeit ïa kane ka kam da ka Sorkar Jylla ne da ka Ingdorbar Thawaiñ hynrei ngi ïohi ba ka Sorkar ka shu pynshai tang ïa ka Roster ha ka jingïalang Kynhun Myntri, ha ka jingïalang ka Meghalaya Democratic Alliance (MDA) bad ha ka jingïalang jong ki seng saiñpyrthei bapher bapher bad ka jingthung jong ka Sorkar Jylla da ka Expert Committee ba la khlieh da ka Dr. Ampareen Lyngdoh kaba long ka Myntri Sorkar ka paw ba ka dei tang ka jingpyntud kai ïa ka por ka bym shong nongrim eiei ruh em lada u Myntri Rangbah ka Jylla u Conrad Kongkal Sangma u la kam ba baroh ki seng saiñpyrthei ki la hun hi jrut ïa ki jingpynshai halor ka Roster System hynrei lait noh tang ka VPP bad ka KHNAM ki bym mynjur.
Ka Sorkar ka long ba kam dei satia ban shim sting ïa kane ka jingdawa kaba u paidbah ka ri Khasi Jaiñtia u la kyrshan. Ka sorkar ka dei ban kyndit bynriew hadien ba ka la ïohi ïa ka jingmih jong u paidbah ha ka 19 tarik mynta u bnai ha ka sngi ba la pynlong ïa ka jingïalang jong ki seng saiñpyrthei kiba angnud ban ïohsngew ïa ka rai kaba mih na ka jingïalang pynban ka long thik kumba bam soh myndong.
Ka jingïeng pyrshah jong ka VPP halor ka jingpyntreikam ïa ka Roster System shadien bad ka jingdawa ban khmih bniah biang ïa ka State Reservation Policy 1972, ka la nang sawa ha man la ki dong ki thaiñ bad ka la nangïoh jingkyrshan. Lada ka Sorkar kam lah ban shim ïa ka rai ha ka por ka ba biang shuwa ba kane ka jingkynad kan bthei sha ka jingbitar bad ka jingïakhih paitbah ka Sorkar kan sa hap ban shim hi ïa la ka jingkitkhlieh.
Ka jinglong ñiangkohnguh jong ki MLA na rilum Khasi bad Jaiñtia kiba don hapoh ka Sorkar MDA-II ka pynpaw shai ba ki pyrkhat tang na ka bynta ka jingmyntoi ka shuki lajong na ka bynta ka samoi san snem katba ki ieh jyndat sharud ïa ka lawei jong ki khun ki kti ki ban sa mad ïa ka jingkthang nangne shakhmat.
Lada ngin peit ruh ïa ki seng riewlum ba kynthup naduh ka UDP bad HSPDP ki la kular sha u paidbah ban pynbeit ïa ka Reservation Policy lada ki wan ha ka bor hynrei ka jingsangp man man jong ki ka la pynbitar ïa kiba bun ki paidbah bad ki la buh jingkylli ruh ïa ki.
Niuma, lada kine ki seng riewlum ba don ha ka sorkar lada kim pyndep ïa kane ka wei na ki mat jong ki kaba ki la kular shuwa ka elekshon kata ban pynbeit ïa ka Reservation Policy ka long kum ka jingtheh umpjah ïa ki nogkyrshan seng riewlum bad lehse kito kiba ju kyrshan ïa kine ki seng ki lah ban leit kyrshan noh ïa ka VPP kaba la pyrshang ha la ka bor ban kren ïa kane ka mat.
Lada ki 36 ngut ki nongmihkhmat na rilum Khasi bad Jaiñtia kim kyndit bynriew kan sa poi ka ïa ba u paidbah un sa ai jingsneng ynda la poi ka samoi jied syiem bad ka ïa ka dang biang ïa ki ban kylla thiah kylla dem noh ïoh u paidbah un ai jingsneng ha u 2028 bad wat ki party riewlum bad ki party hi ba don ha ka sorkar lada kim sngewthuh ïa kane ka jingïoh jingkyrshan ka VPP bad ki ki leh bym suidñiew ïa ka jingsngew u paidbah un sa pynpaw ïa ka jingsngewdom sngewbitar bad ai jingsneng ha ka elekshon MDC ban MP kaba sa long ha u snem ban wan.
