Ïoh rung biang ka Shillong Lajong FC ha ka I-League, ai khublei ki nongpynïaid ïa ki nongkyrshan
Shillong, Jymmang 24 : Ka Shillong Lajong FC sa shisien pat ka la lah ban wan phai biang sha ka lympung 1st division Jong ka Indian league hadien ka jingiakhun kaba iakhaid bha hala ïing haka 21.05.2023 ha SSA Ground Shillong pyrshah ïa ka Benguluru United FC bad ba ka la lah ruh ban khur jingjop da 2-1, bad ïa ki 2 tylli ki goal la thep da u Everbrightson Sana Mylliempdah ha ka kylla step bad pynbud sa u Figo syndai ha ka kylla miet.
Na ki 5 tylli ki team kiba ïakhun ïa ka final round ka Shillong Lajong FC ka ladei ka Team kaba rung nyngkong da kaba ka la ïoh khur jingjop arsien bad ïakhaid shisien rem shisien, bad sa kawei pat ka team ka ban rung sha kane ka lynpung kaba heh jong ka Ri kan long ka Delhi FC ne ka Ambernath United na Mumbai ki ban ïalehkai ha ka 26 Tarik mynta u bnai.
“Ha lyndet jong kane ka jingjop u Coach jong ka kynhun u Bah Bobby L Nongbet bad ki supporting Staff ki jong u ki la long ka daw ba kongsan tam, namar khambun na kine ki khynnah ki dei kiba ma u hi u la pynshitom bun bun tylli ki snem bad ba la mih kine ki soh kiba thiang, ki player la ki dang lung ha ka bor pyrkhat pynban hapoh ka jingïalam jong u kum u head coach ha ryngkat ki Coach nongïarap kum u Asst. Coach u Bah Lekini Suting bad Asst. Coach u Bah Milan Nongkhlaw bad kiwei de ki official jong ka club kiba la trei shitom na ka bynta kane ka ka jingjop,” ong u Bah Seibor Sana Youth Head Coach ka SLFC ha ka kyrwoh khubor.
“Ka mynsiem ba Rangbah jong ki khynnah ka la ïaineh triang wat hapdeng ki jingeh kiba bun ha kane ka lynti ïaid jong ki,” u la bynrap.
“Ka jingïadon bynta bad kylluid mynsiem jong ki dkhot jong ka Shillong Sports Association ba wat hapdeng ka por ba ka jing pynkhreh ïa ka madan ka dang long ha lynti pynban kim shem la pynmih kano kano kaba pyrshah ban ïoh ban lehkai ïa baroh ar tylli ki jingïalehkai ha la ïing jong kane ka wat kaba khadduh eh, ngi da sngewnguh eh ïaphi baroh kum ki dkhot kiba ngim don kyntien ban pynpaw, hynrei ngi kyrpad ba U Blei Un da kyrkhu ïaphi ba phin nang ïoh jing kyrkhu wat ïa ki pateng ki ban dang wan,” u la ong.
“Ngi ai khublei kyrpang ruh ïa ka tnad pynïaid ïalehkai jong ka sorkar jylla lyngba u Sports Minister u Bah Shakliar Warjri ba lashah ban pynlong ïa kane ka jing ïalehkai wat hapdeng ba ka jing maramot ïa ka madan ïalehkai ka dangïaid shait shait. Ngi ai khublei kyrpang ruh ïa u Myntri Rangbah u Conrad K Sangma bad u Bah Banteidor Lyngdoh Myntri sport barim kiba long ka daw bah ban ïoh ïa ka madan ïalehkai kaba biang nadong shadong,” ong u Bah Seibor Sana.
Na ka liang ka club ka ai khublei ruh ïa ka Meghalaya Football Association kaba ka lashah ïa ka club ban don ïa ka second stage match bad ruh ban ïoh ïa ka madan ba ki lah ban kilan met (practice).
“Ka jing sngewnguh kaba khraw eh ka long ïaphi baroh ki nongkyrshan jong ka Shillong Lajong FC kiba wat hapdeng ki jing duh bor duh mynsiem jong ngi, phi la long ha syndah bad ngi kum ka club, dei namar badon maphi sawdong ïa ngi kaba la long ka jingai mynsiem kaba khraw ïa ngi khamtam ïa ki khynnah nong ïalehkai baroh ba ki la lah ban poi shaka thong. Ngi khmih lynti ba phin nang pynrhem ïa kane ka club da ki jingai mynsiem jong phi bad ngi da khmih lynti ruh ba ngin ïoh ban lehkai ïa ka I-League la ha u snem u ban wan ha kane ka stadium jong ka Shillong Sports Association,” la ong u Bah Seibor Sana.