Jop ka Langsning, Ladthalaboh, ïakhaid ka Khliehmawlieh YC bad Selsella SA ha ka MSL

0

Shillong, Jymmang 24 : Ka Langsning FC bad ka Ladthalaboh ki la khur jingjop ha ka jingïalehkai Meghalaya State League (MSL) 2023 katba ka Khliehmawlieh Youth Club bad ka Selsella Sport Association ki la ïakhaid ha ki jingïalehkai ha ka sngi Balang.
Ka Langsning FC ka la khur jingjop da kaba pynliem ïa ka Umrit da 9-1 na ka Group A ha ka jingïalehkai ha madan Third Ground jong ka MFA kaba don ha Polo, ha Jowai, ka Ladthadlaboh ka la kiew sha ka kyrdan ba nyngkong na ka Group B hadien ba ka la pynliem da 2-0 pyrshah ïa ka Mulait United. Katba ha Tura today, ka Khliehmawlieh Youth Club bad ka Selsella Sports Association ki la ïakhaid da 2-2 ha ka jingïalehkai ha madan Chandmari Ground na ka Group D.
Haba phai ha ka jingïalehkai ha nongbah Shillong, ka Langsning ka la ïoh ban pynliem kput ha kaba u Dauruhipaia Pale u ïoh ban thep ar kol (3, 45), Arnesius Marwein (5), Kordor Dkhar (12, 42) bad u Kynsaibor Lhuid (24). U Federick Wahlang u la thep shi kol ha ka minit ba 52 hynrei ka Umrit khatduh ka la ïoh ban thep ïa ka shi kol lyngba u Wanroyshang Sangma ha ka minit ba 68.
Ha madan Kiang Nangbah Stadium , Jowai, ka shim por haduh 40 minit ban ïoh thep kol, ha kaba u Stephanson Pale jong ka Ladthadlaboh u la ïoh ban thep ïa ka shi kol lyngba ka penalty. Hadien 60 second hashuwa ban kut ka kylla step, ka Ladthadlaboh ka la ïoh sa ïa ka kol kaba ar lyngba u Nickyboy Swer ha kaba ka kynhun ka la lamkhmat da 2-0.
Lyngba katei ka jingjop, ka Ladthadlaboh ka la lamkhmat na ka Group B da kaba kamai 10 point hynrei ka Rangdajied United ka lah ban knieh biang ka kyrdan ba nyngkong satang lada ka lah ban pynliem ïa ka Rymbai Iawpynsing ha ka jingïakhun kaban long ha ka sngi Palei. Na ka bynta ka Mulait, ka la pyndep ha katei ka jingïakhun da kaba jop arsien ha ki arsien ïalehkai.
Haba phai sha Tura, ki ar kol la ïoh ban thep hapoh 10 minit ha kaba u Maldrin Marak u la ïoh ban thep nyngkong na ka bynta ka Selsella Sports Association ha ka minit ïalehkai ba dang ïaid saw minit bad u Kyntiew Marthong u la thep ha ka minit ïalehkai ba 6. Shuwa ban kut ka kylla step, kata ha ka minit ba 45 u Maldrin u la ïoh ban thep sa ïa ka kol kaba ar ha kaba ka Selsella ka la ïoh ban lamkhmat ha kaba kut jong ka kylla step. Ka kol kaba pynïakhaid kaba arsien ka la wan urlong ha ka jingïalehkai ba la ïaid 10 minit jong ka kylla miet lyngba u D Marngar.
Ha ka Group D, ka Wasa FC bad ka Khliehmawlieh baroh ar ki kamai 7 point hadien laisien ïalehkai,bad baroh ar kine ki kynhun ki khlem pat ïoh ban ïakhun mar pyrshah.
Ki don satang mar shisien ïalehkai ha ka sngi Palei, ha kaba na ka Group A, C bad D yn ym don ki jingïalehkai. Ha kane ka sngi Palei, tang na ka Group B kata hapdeng ka Rangdajied United pyrshah ïa ka Rymbai Iawpynsing ha Jowai ha ka por 2:30 baje janmiet.

Leave A Reply

Your email address will not be published.